Almaty men Lıtva arasyndaǵy taýar aınalymy 40 mln dollardy qurady
ALMATY. QazAqparat – Baqytjan Saǵyntaev Lıtvanyń Qazaqstandaǵy Tótenshe jáne Ókiletti Elshisi Vasıýlıs Gıntaýtas pen Lıtva qalalarynyń merlerimen kezdesti. Olar ózara ekonomıka, mádenıet jáne týrızm salalaryndaǵy yntymaqtastyqty nyǵaıtý máselelerin talqylady, dep habarlaıdy QazAqparat tilshisi.
Kezdesýde ekonomıka, mádenıet jáne týrızm salasyndaǵy ózara tıimdi yntymaqtastyqty keńeıtý múmkindikteri qarastyryldy. Búginde Almatyda saýda, logıstıka jáne aýylsharýashylyq ónimderin óńdeýde lıtvalyq kapıtaldyń qatysýymen 94 kásiporyn jumys isteıdi. Ótken jyly Almaty men Lıtva arasyndaǵy taýar aınalymy 40 mıllıon dollardy qurady.
«Biz Smart City qalasyn basqarýdyń ınnovatsııalyq jobalaryn júzege asyrýda Lıtva qalalarynyń tájirıbesine qyzyǵýshylyq tanytamyz. Búgingi tańda Almaty turǵyn úı-kommýnaldyq sharýashylyǵyn, kólik, densaýlyq saqtaý, bilim berý jáne qoǵamdyq qaýipsizdikti tsıfrlandyrý boıynsha belsendi jumys júrgizýde. Erteńgi bıznes-forýmda bizdiń kásipkerler birlesken jobalardy júzege asyrý perspektıvalaryn talqylaýǵa múmkindik alady. Mundaı kezdesýler ózara tıimdi yntymaqtastyqty odan ári damytýǵa serpin beretinine senimdimin», - dedi Almaty qalasynyń ákimi Baqytjan Saǵyntaev Lıtva delegatsııasymen kezdesý barysynda.
Ýkmerge, Kedaınıaı, Zarasaı, Bırjaı, Kaıshıadorıs, Rokıshkıs, Elektrenaı, Majeıkıaı jáne Kaýnas aýdany sııaqty qalalar men aýdandardyń merleri men ókilderi óz qalalarynyń erekshelikteri men múmkindikteri týraly aıtty.
Sonymen qatar, Lıtva saýda-ónerkásiptik palatasynyń ókilderi Eýroodaq talaptaryna sáıkes joǵary tehnologııalyq jobalar men ónimderdi shyǵarý tájirıbesimen bólisýge daıyn ekendikterin bildirdi. Lıtva delegatsııasynyń ókilderi almatylyq bıznesti óz eliniń logıstıkalyq jáne eksporttyq áleýetin paıdalanýǵa shaqyrdy.
