Almaty men Qaraǵandyda 11 adam qar qursaýynan qutqaryldy
ASTANA. QazAqparat - Almaty men Qaraǵandy oblystaryndaǵy joldarda 11 adam qutqaryldy. Bul týraly QR ІІM Tótenshe jaǵdaılar komıtetiniń resmı ókili Nursultan Nurahmetov habarlady.
Qaraǵandy oblysynyń Jańaarqa aýdanynda Qyzylorda-Pavlodar avtojolynyń 679 shaqyrymynda, Aqtúbek aýylynan 30 shaqyrym jerde «Qyzylorda-Astana» baǵytyndaǵy «Mercedes» markaly jolaýshylar avtobýsynan tehnıkalyq aqaý tabylǵan. Ondaǵy jeti jolaýshyny TJK trassadaǵy medıtsınalyq-qutqarý beketiniń kúshteri qutqardy jáne Aqtúbek aýylyna jetkizdi.
Avtobýsta barlyǵy 12 jolaýshy bolǵan. Olardyń beseýi ózge kólikterge minip, saparyn jalǵastyrǵan. Qutqarylǵan jolaýshylar medıtsınalyq kómekti qajet etken joq.
Odan bólek, Almaty oblysy Alakól aýdanynda Úsharal-Dostyq avtojolynyń 110 shaqyrymynda, Aqshı aýylynan 60 shaqyrym jerde Almaty oblysynyń TJD jedel-qutqarý jasaǵy qar qursaýynan 4 júk avtokóligin qutqaryp, 4 adamdy Aqshı aýylyna jetkizdi. Olar da medıtsınalyq kómek suraǵan joq.
