Almaty men Beıjiń: Búgin XXIV qysqy Olımpıada qaı qalada ótetini belgili bolady
ASTANA. QazAqparat - Búgin, 31 shilde kúni «2022 jylǵy XXIV qysqy Olımpıada oıyndarynyń» qaı qalada ótetini belgili bolady. Tarıhı tańdaý jasalynatyn sátke sanaýly saǵattar ǵana qaldy.
Malaızııanyń Kýala-Lýmpýr qalasynda HOK 2022 jylǵy qysqy Olımpıada oıyndaryn ótkizýge Almaty men Beıjińniń qaısysy laıyq ekeni anyqtalatyn bolady. HOK músheleriniń tańdaýy Almatyǵa túse me, álde Qytaı astanasy Beıjińge túse me, ony barsha qazaqstandyqtar «Kazsport» telearnasynan tikeleı efırde kóre alady.
31 shilde kúni saǵat 15:00-de Almatydaǵy Abaı alańynda Kýala-Lýmpýrda ótetin Halyqaralyq Olımpıada Komıtetiniń sessııasynan tikeleı kórsetilim uıymdastyrylady. Qala turǵyndary men qonaqtary atalǵan ýaqytta Almaty kandıdatýrasyn qoldaý úshin alańǵa jınalmaq. Al Almatyny qoldaý úshin elimizdiń kóptegen tanymal sportshylary Malaızııaǵa attanyp ketti. Olardyń qatarynda bokstan Olımpıada chempıondary Ermahan Ybyraıymov, Serik Sápıev jáne konkıden álem chempıony Denıs Kýzın, Sochıdegi qysqy Olımpıadanyń júldegeri, mánerlep syrǵanaýshy Denıs Ten, tanymal voleıbolshy Sabına Altynbekova jáne taǵy basqa belgili sportshylar bar.
Eske sala keteıik, álemdik mańyzǵa ıe aıtýly sport dodasyn ótkizý úshin áýel basta álemniń onshaqty eli óz ótinishterin bildirgen. Alaıda, ýaqyt óte kele kópshiligi ótinimderin keri qaıtaryp aldy. Sońynda eki qala - Almaty men Qytaı astanasy Beıjiń qalalary úmitker retinde qaldy.
Qarsylasymyz osal qala emes ekeni aıtpasaq ta belgili. Olar 2008 jyly jazǵy Olımpıada oıyndaryn ótkizdi. Jazǵy Olımpıada ótkizýge múmkindigi bolǵan eldiń qysqy Olımpıadany ótkizýge de qaýqary jetetini anyq. Biraq, Almaty da barlyq talaptarǵa saqadaı-saı deýge bolady. Áıtkenmen, baq shaba ma, bap shaba ma, muny sanaýly saǵattardan keıin biletin bolamyz.
