Almaty men Astana turǵyndarynyń 10 %-ynda qant mólsheri joǵary
ALMATY. QazAqparat - Almatyda «Nazar aýdaryńyzdar: Dıabet - alysta emes» jobasy aıasynda júrgizilgen úsh jyldyq zertteý jumystarynyń qorytyndysy shyqty, dep habarlaıdy QazAqparat tilshisi.
Zertteý nátıjesine sáıkes, Almaty men Astana turǵyndarynyń 10%-ynyń qanynda qant kórsetkishi joǵary ekendigi anyqtaldy.
Dárigerler qoǵamdyq oryndarda, bilim berý uıymdary men kásiporyndarda 65 myń adamdy teksergen.
Almatyda 43 myń adam, Astanada 22 myń adam dárigerlerdiń baqylaýynan ótti.
«Kóptegen adam qanyndaǵy qant kóleminiń joǵary ekendigin múlde bilmegen. Bul dıabet emes, árıne, sonda da saqtyq tanytý kerek. Bul azamattardyń barlyǵy zerthanalyq tekserýge jiberildi», - dedi jobanyń úılestirýshisi Álibek Ibragımov.
Mamandardyń aıtýynsha, naýqas azamattardyń 90 %-y Dıabettiń ekinshi tıpine shaldyǵady. Bul aýrý qozǵalyssyz ómir saltynyń kesirinen, durys tamaqtanbaýdan paıda bolady.
Búginde Qazaqstanda 307 000 adam esepte tur. Joba aıasynda 300 mektepte túsindirý jumystary júrgizildi.
Aıta ketý kerek, bul joba «Fond dıabetıcheskogo prosveşenııa Respýblıkı Kazahstan» qorynyń, QR Bilim jáne ǵylymı mınıstrliginiń, QR Densaýlyq saqtaý mınıstrliginiń, Astana men Almaty ákimdikteriniń qoldaýymen ótti.
