Almaty men Astana qalalarynda stýdenttik qalashyqtar salynady - bilim jáne ǵylym mınıstrliginiń jaýapty hatshysy
ALMATY. 31 qazan. QazAqparat /Erlik Erjanuly/ - Elbasynyń stýdenttik baspana salý tapsyrmasy boıynsha, 2015 jylǵa deıin jańadan 24 jataqhana salynyp, 54 joǵary oqý ornyna kúrdeli jóndeý jumystary júrgiziledi. Bul jóninde búgin Almatyda ótip jatqan QR Prezıdenti janyndaǵy Jastar saıasaty jónindegi keńestiń ІH otyrysynda aıtyldy.
"Almatyda 20 myń oryndyq, al Astanada 10 myń oryndyq stýdenttik qalashyqtar salynady. Joba quny 95 mıllıard teńge. Qazir jergilikti ákimdikterden qalashyq salynatyn jer bólinip, jobalyq ekonomıkalyq negizdemesi jasalýda", - deıdi bilim jáne ǵylym mınıstrliginiń jaýapty hatshysy Bolatbek Ábdirásilov.
Onyń aıtýynsha, bul qalashyqtardyń qurylysy 2012 jyldyń aıaǵy men 2013 jyldyń basynda bastalady dep josparlanýda. Sondaı-aq "Stýdentter týraly" jań zań jobasynda kúndizgi bólimde oqıtyn stýdentterdiń qoǵamdaǵy kólikte jol aqysynyń 50 paıyzyna jergilikti ákimshilikterdiń sheshimimen jeńildik jasaý qaralýda. Qazir bul quqyq barlyq jerde birdeı júzege asyrylyp jatqan joq. Stýdentterdiń qalaaralyq avtobýspen jylyna 2 ret 50 paıyzdyq jeńildikpen júrýine respýblıkalyq bıýdjetten 9 mıllıard teńge bólý qarastyrylýda.
