Almaty men Astana aglomeratsııalarynyń keshendi jospary jyl sońyna deıin usynylady - B.Jámishev
ASTANA. QazAqparat - Almaty men Astana aglomeratsııalarynyń keshendi jospary jyl sońyna deıin usynylatyn bolady. Bul týraly búgin Astanada "Qazaqstannyń óńirlerin damytýǵa arnalǵan múmkindikter, jaǵdaılar jáne usynystar" atty halyqaralyq konferentsııada QR Óńirlik damý mınıstri Bolat Jámishev málim etti.
"Bıyl biz Almaty men Astana aglomeratsııalarynyń keshendi josparyn jasaqtaýmyz qajet. Tıisti jumystar atqarylýda. Jyl sońynda deıin qajetti qujattar usynylatyn bolady. Onyń qatarynda arhıtektýralyq jáne qala qurylysy jospary júıesinde eń keshendi bolyp sanalatyn aýmaqty uıymdastyrýdyń bas syzbasy qujaty bar. Kelesi kezeń - aımaqaralyq shemalardy daıyndaý. Arhıtektýralyq jáne qala qurylysy týraly zańda aglomeratsııalar arasynda aımaqaralyq shemalardy jasaqtaý qajet. Bul óz kezeginde aglomeratsııalardyń damý syzbasynyń túp-tamyry bolyp tabylady. Keıin osy syzbalardyń negizinde aglomeratsııalarǵa enetin eldi mekenderdiń bas shemalary qabyldanady", - dep atap ótti mınıstr.
Onyń aıtýynsha, aımaqaralyq syzbamen birge aglomeratsııalardy tıimdi basqarýdyń keshendi jospary qurylatyn bolady.
"Aglomeratsııalardyń damýy arhıtektýralyq jáne qala qurylysy salasynyń máselesi emes, sonymen qatar ol basqarý salasyna da qatysty. Sondyqtan osymen qatar aımaqaralyq shemalarǵa enbeıtin ózge de máseleler qarastyrylatyn keshendi jospar jasalady. Memleket basshysynyń tapsyrmasyna sáıkes, j yl sońynda deıin Úkimettiń jospary boıynsha qajetti nátıje berýimiz shart", - dedi B.Jámishev.
Aıta keteıik, QR Prezıdenti N.Nazarbaev Qazaqstan halqyna Joldaýynda Astana men Almaty qalalarynda aglomeratsııalardy qurý jóninde tapsyrma bergen bolatyn.
