Almaty men Ashhabad arasyndaǵy áýe reısteri qaıta iske qosyldy

ASTANA. QazAqparat - «Túrikmenstan» áýe kompanııasy Almaty men Ashhabad arasyndaǵy reısterdi qaıta bastady, dep habarlaıdy QazAqparat Azamattyq avıatsııa komıtetine silteme jasap.

Ushý geografııasyn keńeıtý jáne halyqaralyq reıster sanyn ulǵaıtý jónindegi jumys sheńberinde Azamattyq avıatsııa komıteti túrikmen tarapymen birlesip, Qazaqstan men Túrikmenstan arasyndaǵy áýe qatynasyn qalpyna keltirdi.

Osylaısha 2023 jyldyń 2 maýsymynan bastap «Túrikmenstan» áýe kompanııasy eki el arasyndaǵy turaqty jolaýshy reısterin qaıta bastady.

Tasymal «Boıng – 737» áýe kemesimen juma kúnderi aptasyna 1 reıs jıiligimen Almaty-Ashhabad baǵytynda jasalady.

«Áýe qatynasyn qalpyna keltirý elder arasyndaǵy saýda-ekonomıkalyq, iskerlik, týrıstik jáne mádenı yntymaqtastyqty odan ári damytýǵa yqpal etedi» deıdi komıtettiń baspasóz qyzmeti.