Almaty men Almaty oblysynda talapqa saı emes jol-qurylys materıaldary anyqtaldy

ALMATY. QazAqparat - Almaty oblysynda 273, Almaty qalasy boıynsha 26 standartqa saı emes jol-qurylys materıaly anyqtaldy. Bul týraly óńirlik kommýnıkatsııalar qyzmetinde ótken baspasóz máslıhatynda Jol aktıvteriniń ulttyq sapa ortalyǵynyń mamandary aıtty, dep habarlaıdy QazAqparat tilshisi.

Almaty oblysy boıynsha Jol aktıvteri sapasynyń ulttyq ortalyǵynyń zerthana meńgerýshisi Aıdyn Áshirbekov oblysta 792 jol-qurylys materıaldarynyń synamasy synalǵanyn, onyń 273-i (34%) standart talaptaryna sáıkes kelmeıtinin atap ótti.

Ortalyqtyń zerthanasyna respýblıkalyq mańyzdy joldardan 365, al oblystyq, aýdandyq jáne aýyldyq joldan 340 synama alynǵan.

Aıtýynsha, bul – sońǵy jarty jyldyń nátıjesi.

«Dıagnostıkanyń negizgi mindeti – jol qurylysyn tekserý, baǵalaý. 2022 jyly, ıaǵnı byltyr 1619 km jol, bıyl 699 km jol tekserildi. Jyldyń aıaǵyna deıin byltyrǵy kórsetkishten asyp ketedi. Sondaı-aq bıyldan bastap jergilikti atqarýshy organdar boıynsha da vedomstvolyq saraptama júrgiziletin bolady», –dedi «Jol aktıvteriniń ulttyq sapa ortalyǵy» Almaty oblysy boıynsha fılıalynyń zerthana meńgerýshisi Aıdyn Áshirbekov.

Almaty qalasy boıynsha JASUO mamandary 98 ret jol ýchaskelerin aralap tekserý júrgizgen, nátıjesinde asfaltbeton qospasyn tóseý tehnologııasy buzylǵan 46 jaǵdaı anyqtaldy.

Aıtalyq, asfaltbeton jabyny tıisti qalyńdyqta tóselmegen, qospanyń negizi daıyndalmaǵan, negizdi tegisteý jáne basqa da jumystar durys júrgizilmegen.

«Jyl basynan beri megapolıste 14 nysan qurylyspen qamtyldy, olar boıynsha 41 synama alyndy, onyń 26-sy QR Ulttyq standarttarynyń talaptaryna sáıkes kelmeıdi. Buqtyrma kóshesi men Qulja tas jolynda anyqtalǵan olqylyqty merdiger kompanııa óz qarajaty esebinen joıdy. ıAǵnı, №4 jáne №7 sezdiń jol jabyny qaıta tóseldi», –dedi «Jol aktıvteriniń ulttyq sapa ortalyǵy» Almaty qalasy boıynsha fılıalynyń dırektory Ashat Úsenov.