Almaty men Alakól arasynda taǵy bir poıyz jolǵa shyǵady

NUR-SULTAN. QazAqparat - «Almaty-2 – Dostyq» baǵytyndaǵy jańa №211/212 poıyzy aptasyna eki ret qatynaıtyn bolady, dep habarlaıdy QazAqparat «Jolaýshylar tasymaly» AQ baspasóz qyzmetine silteme jasap.

Aıtalyq, atalmysh poıyz Almaty-2 stantsııasynan 1 shildeden 9 tamyzǵa deıin beısenbi jáne dúısenbi kúnderi attanady. Bul poıyzdyń vagondary aýa baptaǵyshpen jabdyqtalǵan.

Jalpy, Alakól baǵytynda jańa poıyzdy eskere otyryp, 11 poıyz (8-i - «Jolaýshylar tasymaly»AQ, 3 - jeke tasymaldaýshylar) qatynap júr.

Atap aıtqanda, Nur-Sultannan - 3 poıyz; Almatydan - 5 poıyz (2020 jyly 3 poıyz bolǵan); Shyǵys Qazaqstan oblysynan - 2 poıyz jáne qala mańynda - 1 poıyz.

Ulttyq tasymaldaýshy jolaýshylardan BILET.RAILWAYS.KZ saıty nemese «QTJ bıletteri» mobıldi qosymshasy arqyly onlaın bılet resimdeýdi ótinedi.

Qajet bolǵan jaǵdaıda temirjol bıletin satyp alý úshin «Kútý paraǵy» fýnktsıonalyn paıdalanýǵa bolady.

Sondaı-aq, karantın rejımine baılanysty jolaýshylardyń jol boıynda jáne elimizdiń vokzaldarynda maska rejımin saqtaǵany abzal.