Almaty mektepteriniń birine ulaǵatty ustaz Rafıqa Nurtazınanyń esimi berilmek
NUR-SULTAN. QazAqparat – Almaty qalasynda bıyl ashylatyn mektepteriniń birine ulaǵatty ustaz Rafıqa Nurtazınanyń esimi berilmek. Bul jaıynda Senat depýtattarynyń saýalyna QR Premer-Mınıstri Asqar Mamınniń jaýabynda aıtylǵan, dep habarlaıdy QazAqparat tilshisi.
«Elimizdiń bilim salasynyń damýyna eleýli úles qosqan ulaǵatty ustaz R. Nurtazınanyń esimin ardaqtaý boıynsha tıisti sharalar qabyldanýda. 2018 jyly Almaty qalasynyń Bostandyq aýdanynyń «Nurlytaý» shaǵyn aýdanyndaǵy burynǵy Yntymaq kóshesine Rafıqa Bekenqyzy Nurtazınanyń esimi berildi», - dedi Úkimet basshysy.
Onyń atap ótýinshe, ótken jylǵy Almaty qalasynyń Tarıhı jáne mádenı eskertkishterdi qorǵaý jónindegi komıssııasynyń sheshimine sáıkes Shoqan Ýálıhanov atyndaǵy № 12 mektep qabyrǵasyna R.Nurtazınaǵa arnalǵan memorıaldyq taqta ornatyldy.
«Qazirgi kezde Almaty qalasynyń ákimdigi qalada 2021 jyly ashý josparlanǵan jańa mektepterdiń birine R. Nurtazınanyń esimin berý máselesin pysyqtaýda. Bul másele mektep qurylysy aıaqtalǵannan keıin Almaty qalasy ákimdigi usynysynyń negizinde Úkimet janyndaǵy Respýblıkalyq onomastıka komıssııasynyń otyrysyna shyǵarylady», - dedi Asqar Mamın.
