Almaty mektepteriniń 41 paıyzy jańa tıptegi, zamanaýı quraldarmen jabdyqtalǵan - qala ákimi A.Esimov
ALMATY. Qyrkúıektiń 1-i. QazAqparat /Ádilet Musahaev/ - Búgin Almaty qalasynyń ákimi Ahmetjan Esimov jańa ǵasyr №175 gımnazııanyń alǵashqy qońyraý saltanatty rásimine qatysyp, mekteptiń oqý jylyna degen daıyndyǵymen tanysty, dep habarlaıdy QazAqparat.
Qala ákimi oqýshylardy búgingi jańadan bastalyp jatqan oqý jyldarymen quttyqtaı kele, olardyń sapaly bilim alýyna barlyq jaǵdaı jasalǵandyǵyn jetkizdi. "Búgin qalamyzdyń 181 mektebinde 159 myń bala bilim alýda. Onyń ishinde 15 myń bala mektep tabaldyryǵyn búgin birinshi ret attap otyr. Oqýshylar úshin bul úlken este qalatyn jaǵdaı. 12 myń 104 ustaz sizderge ózderiniń bilimin, tálim-tárbıesin berip, úlken ómirge daıyndaıdy. 181 mekteptiń 74-i, ıaǵnı 41 paıyzy jańa tıptegi, zamanaýı quraldarmen jabdyqtalǵan mektepter", deıdi A.Esimov.
Qala basshysy sonymen qatar elimizdiń órkenıetti elderdiń qatarynan kórinýi úshin jastarymyz bilikti, bilimdi bolyp, otanyn súıýi kerektigin aıtyp ótti. "Osy jastyq shaq, ıaǵnı bilim alatyn kezeńde sizder ýaqytty bos ótkizbeı barlyq kúsh-jiger, yntalaryńyzdy bilimge salyńyzdar", dep atap ótti Ahmetjan Esimov.
Osydan 5 jyl buryn ashylǵan №175 gımnazııa qazaq jáne aǵylshyn tilderin tereńdetip oqytýǵa arnalǵan. Búgin bul mektepke 151 oqýshy birinshi synypqa qabyldanyp otyr. Mektepte 100 kompıýter, 7 ınteraktıvtik taqta, fızıka, hımııa, bıologııa pánderiniń arnaıy synyptarymen qosa mýltımedııalyq kabınetteri bar. Sonymen qatar 3 sportzal jáne ashanamen qamtylǵan mektepte zamanǵa saı tárbıe, bilim alýǵa tolyqtaı jaǵdaı jasalǵan.
