Almaty mektepterinen jarylǵysh zat tabylǵan joq

ALMATY. QazAqparat - Almatyda «bomba qoıylǵan» bilim mekemelerinen jarylǵysh zat tabylǵan joq, dep habarlaıdy QazAqparat tilshisi.

Qalalyq polıtsııa departamentiniń baspasóz qyzmetinen málim etkendeı, Almaty qalasyndaǵy №87 jáne 66 mektep ǵımarattaryn tekserý kezinde jarylys qurylǵylary tabylǵan joq.

Buǵan deıin megapolıste atalǵan eki mektepte «bomba» qoıylǵany týraly aqparat taraǵan bolatyn. Bilim mekemelerinde alǵashqy den qoıý aıasynda qalanyń jedel jáne tótenshe jaǵdaılar qyzmeti tekserý jumystaryn júrgizdi.

Aıta keteıik, 23 qarasha kúni Talǵar qalasynda №3 orta mektepke jarylǵysh zat qoıylǵany týraly habarlamadan keıin ǵımarattan 1100 adam evakýatsııalanǵan edi.

Almaty oblystyq Polıtsııa departamentiniń málimdeýinshe, belgisiz bireý mekteptiń elektrondy poshtasyna bilim ordasyna jarylǵysh zat qoıylǵandyǵy týraly habarlama joldaǵan.