Almaty mektepterine keshendi qaýipsizdik júıesi engiziledi

ALMATY. QazAqparat- 2023 jyldan bastap jalpy bilim beretin mektepterde týrnıket, dabyl túımeleri men beınebaqylaý júıesi ornatylady. Bul týraly baspasóz máslıhaty barysynda Almaty ákiminiń orynbasary Ásem Núsipova málim etti, dep habarlaıdy QazAqparat tilshisi.

«Keler jyldan bastap mektepterde keshendi qaýipsizdik júıesi engizilip, dabyl túımeleri, ótý júıesi (týrnıketter), órt qaýipsizdigi júıesi, polıtsııanyń jedel basqarý ortalyqtarymen biriktirilgen beınebaqylaý kameralary ornatylady. Biz bul jobany úsh jyldyq servıstik úlgi boıynsha qarjylandyrýdy josparlap otyrmyz, jalpy qarjylandyrý kólemi - 4,9 mlrd teńge. Al 2023 jylǵa arnalǵan bıýdjet jobasynda osy maqsattarǵa 1,6 mlrd tenge bólindi», - dedi spıker.

Aıtýynsha, zamanaýı ınfraqurylymdy jaqsartý arqyly 2025 jylǵa deıin barlyq memlekettik mektepter fızıka, hımııa, bıologııa, ınformatıka jáne robototehnıkanyń jańa býynynyń pándik kabınetterimen qamtamasyz etiledi.

«Tek 2023 jyldyń ózinde jańa modıfıkatsııadaǵy 168 shkaf satyp alynady, oǵan jergilikti qordan 2,1 mlrd teńge bólindi», - dedi Ásem Núsipova.

Sondaı-aq ol Almatyda 2023 jyldan bastap 7,7 myń oqýshy úshin «Mektep avtobýsy» jobasy bastalatynyn tilge tıek etti.

«Almatyda oqýshylardy tasymaldaýdyń jaılylyǵy men qaýipsizdigin arttyrý maqsatynda 2023 jyldan bastap qalanyń 8 aýdanyndaǵy 29 mektepte 7,7 myń balaǵa arnalǵan «Mektep avtobýsy» jobasy bastalady», - dep atap ótti ol.