Almaty mektepterindegi beınekameralar polıtsııaǵa qosyldy

ALMATY. QazAqparat - Almaty mektepterindegi kameralar polıtsııaǵa qosyldy. Bul týraly Almaty qalalyq polıtsııa departamentiniń basshysy Qanat Taımerdenov málim etti, dep habarlaıdy QazAqparat tilshisi.

«Reseı Federatsııasynyń Qazan jáne Perm qalalarynda bolǵan qaıǵyly oqıǵalardy bári biledi. Balalardyń qaýipsizdigin qamtamasyz etý maqsatynda bilim berý mekemelerinde aldyn alý sharalary kúsheıtildi. Búgingi tańda qaladaǵy barlyq 207 mektepte 4 414 beınebaqylaý kamerasy ornatyldy, onyń 2 620-sy jedel basqarý ortalyǵyna qosyldy. Qalǵany jaqyn arada qosylady. Sonymen qatar, bilim berý uıymdarynda júrgizilgen tekseris, qalanyń barlyq mektepterinde kúzet agenttigine habar beretin dabyl túımeleri ornatylǵanyn jáne jumys istep turǵanyn kórsetti», – dedi Qanat Taımerdenov.

Sondaı-aq, bilim mekemeleri dabyl qurylǵylarymen jabdyqtalǵan, olarda daýys zoraıtqysh baılanys júıesi de bar, bilim berý uıymdarynyń ákimshilik ǵımarattaryna kirýdi baqylaý jáne basqarý úshin qondyrǵylar ornatyldy.

Sonymen qatar, 150 mektepke deıingi bilim berý mekemesi beınebaqylaý júıesimen jabdyqtalǵan.