Almaty mektepterinde sońǵy qońyraý barlyq synyptar úshin soǵylmaıdy

ALMATY. QazAqparat - Megapolıste 4, 9 jáne 11-synyp oqýshylary úshin ǵana oqý jylynyń aıaqtalýyna oraı saltanatty is-shara ótkiziledi. Bul týraly óńirlik kommýnıkatsııalar qyzmetiniń alańynda Almaty qalalyq Bilim basqarmasy basshysynyń orynbasary Janat Aıtpaeva málim etti, dep habarlaıdy QazAqparat tilshisi.

Aıtýynsha, Oqý-aǵartý mınıstrliginiń buıryǵyna sáıkes oqý jylynyń merzimi 2023 jyldyń 31 mamyrynda aıaqtalady.

«Sońǵy sabaq kúni barlyq mektepter bekitilgen kestege sáıkes óz sabaqtaryn ótkizedi jáne oqý kúnin synyp saǵatymen aıaqtaıdy. Synyp saǵatynyń maqsaty – oqý jylyn qorytyndylaý jáne jazǵy demalys kezeńine balalardy daıyndaý», - dedi Janat Aıtpaeva.

Spıkerdiń sózinshe, synyp saǵattarynyń stsenarıılerin pedagogter ár synyptyń jas ereksheligin eskere otyryp, óz betinshe ázirleıdi.

«Synyp saǵatynda negizinen patrıotızm, otandy súıý, dostyq, tatýlyq, el tarıhyna, saıası repressııa men ashtyq qurbandarynyń esimderine qurmet tanytý taqyryptaryna basymdyq berilýi kerek»,- dedi ol.

Qalalyq Bilim basqarmasy ókiliniń aıtýynsha, 1 maýsym kúni 4, 9 jáne 11-synyp oqýshylary úshin oqý jylynyń aıaqtalýyna oraı saltanatty is-shara ótkiziledi.

«Biz oqý jylynyń aıaqtalýy boıynsha saltanatty is-sharany ótkizýge qatysty barlyq mektep dástúrlerin qoldaı otyryp, mektepter saltanatty jıyn ótkizý týraly sheshimdi derbes qabyldaıtynyn habarlaımyz», - dep tolyqtyrdy Janat Aıtpaeva.