Almaty mektepterinde «Ólketaný» jańa páni engizildi
Memleket basshysynyń «Rýhanı jańǵyrý» baǵdarlamasy aıasynda engizilip jatqan jańa pán ázirge 5 mektepte qanatqaqty rejimde oqytyla bastaıdy.
Qala ákimi keńes barysynda Elbasynyń «Rýhanı jańǵyrý» baǵdarlamasy sheńberindegi latyn álipbıine kóshý, týǵan jer, qasterli geografııalyq oryndar, jahandaǵy qazaq mádenıeti máselelerin tilge tıek etti.
«Rýhanı jańǵyrý» aıasyndaǵy sizderdiń jumystaryńyzǵa tikeleı qatysy bar jobalarǵa toqtalǵym keledi. «Týǵan jer» jobasy sheńberinde patrıotızmniń eń jarqyn úlgisi retinde mektepterde týǵan jerdiń tarıhyn oqytý qolǵa alynbaq. Jas órender týǵan jeriniń tarıhyn jaqsy bilýi kerek. Ol - otansúıgishtiktiń negizi. Sondyqtan, byltyr ǵana ıÝNESKO sheńberinde ótken Almatynyń 1000 jyldyǵy aıasynda balalarǵa súıikti qalasynyń 10 ǵasyrlyq tarıhy men búgininen maǵlumat beretin kitap shyǵaryp, úlestirdik.
Jalpy bul baǵytta elimizde kelesi oqý jylynan bastap orta bilim berý júıesinde «ólketaný» kýrsyn engizý josparlanyp otyr. Almaty qalasy bul mindetti oryndaýda aldyńǵy qatardan tabylyp, jańa oqý jylynan bastap atalǵan pándi pılottyq joba retinde engizetin bolady», - dedi Baýyrjan Baıbek.
Sondaı-aq, qala ákimi qalanyń barlyq mektepterinde oqý jylynyń alǵashqy kúni Elbasynyń «Rýhanı jańǵyrý» baǵdarlamasy sheńberinde «Men - óz otanymnyń patrıoty» taqyrybynda tárbıe saǵaty ótkiziletinin aıtty. Shahar basshysy atalǵan tárbıe saǵatyna ózi jeke qatysatynyn jetkizdi.
Onyń aıtýynsha, bilimdi damytýǵa memleket qarjysymen qatar jeke ınvestorlar da qomaqty úles qosyp keledi.
«Bul da «Týǵan jer» taqyrybymen astasyp jatyr. Qalada memlekettik-jekemenshik áriptestik aıasynda 175 jekemenshik balabaqsha men shaǵyn ortalyq ashyldy, onda 5,7 myń bala tárbıe alyp jatyr. Bıyl 2000 balany qamtyǵan 57 balabaqsha ashyldy. Osynyń arqasynda qala bıýdjetinen 14 mlrd teńge únemdelgen. Osy qarajatty biz memlekettik mektep pen balabaqsha salýǵa jumsaıtyn bolamyz», - dedi Baýyrjan Baıbek.
Onyń aıtýynsha, bıyl Almatyda bilim berý salasyna 86 mlrd teńge qarastyrylǵan.
