Almaty mektepterinde balalardyń densaýlyǵy men ómiriniń qaýipsizdigin qamtamasyz etýge basa kóńil aýdarylǵan - Rahat Shımasheva
ALMATY. 27 sáýir. QazAqparat /Názıra Eleýhan/ - Orta bilim berý mekemelerinde balalardyń ómirin qorǵaýǵa, densaýlyǵyn, ómir qaýipsizdigin saqtaýǵa basa nazar aýdarylǵan.
Bul týraly búgin Almatyda ótken qalalyq máslıhatta Almaty qalasy bilim basqarmasynyń bastyǵy Rahat Shımasheva aıtty.
Onyń aıtýynsha, qalanyń barlyq mektepterine, Bilim basqarmasy men Ortalyq baqylaý orynyna aqparat kelip túsetin beınebaqylaý júıesi ornatylǵan. «Osy maqsatta jergilikti bıýdjetten 87 mıllıon 559 myń teńge jumsaldy. Respýblıka kóleminde tek Almaty qalasynyń mektepterinde ǵana qaýipsizdik keshendi júıesi bar. Ár mektepte 8 beıne kameradan ornatylǵan. Baqylaýdy óz dárejesinde tolyq qamtý úshin bul áli az, qosymsha taǵy da 8 beıne kamera qajet», - dep atap ótti R.Shımasheva.
Onyń aıtýynsha, qalanyń bilim mekemelerin oqýlyqtarmen jáne oqý-ádistemelik quraldarmen qamtamasyz etý árdaıym Bilim basqarmasynyń baqylaýynda. «2009-2010 oqý jylynda oqý ádebıetterin alýǵa jergilikti bıýdjetten 867 mln. 173 myń teńge bólinse, 2010-2011 oqý jylynda 999 mln.616 myń teńge bólindi. Bul qarajat ótken jylmen salystyrǵanda 132 mln. 443 myń teńgege artyq»,-dedi ol.
Rahat Shımasheva sonymen qatar: "Bıyl osymen altynshy jyl qatarynan 1-4 synyp oqýshylary tegin ystyq tamaqpen qamtylýda. Bul maqsatqa 2011 jyly 2 mlrd. 792 mln. teńge bólindi, bul 2010 jylmen salystyrǵanda 429 mln. teńgege kóp. Bir oqýshyǵa shaqqanda tamaqtyń baǵasy 220 teńgeden 250 teńgege artty",-dedi.
