Almaty mektepterinde 19 myńnan asa balaǵa oryn jetpeıdi
ALMATY. QazAqparat- Almaty mektepterinde oryn tapshylyǵy azaımaı otyr, dep habarlaıdy QazAqparat tilshisi.
Búginde megapolıste 19 600 balaǵa oryn jetpeıdi. Atalǵan másele 2022-2024 jyldarǵa arnalǵan Almaty qalasyn damytý jospary arqyly sheshilýi múmkin. Qala ákimi Erbolat Dosaevtyń sózinshe, byltyr qalada 12 myńnan astam orynǵa arnalǵan zamanaýı úlgidegi 8 memlekettik mektep salý úshin aýqymdy joba bastaldy. Onyń ishinde 7800 oryndyq 5 mektep Alataý aýdanynda ashylatyn bolady.
«Alaıda, aldyn ala esepteýimiz boıynsha jańa 7800 oqýshy ornynyń paıdalanýǵa berilgenine qaramastan, jalpy qala, ár aýdan boıynsha bilim alýshylardyń jyl saıyn ósýine baılanysty mektepterde 3 myńǵa jýyq oryn tapshylyǵy saqtalady. Qurylystan basqa, budan ári ǵımarattar men jer ýchaskelerin jekemenshik ıelerinen satyp alýmen qatar, basqa da tetikter qoldanylatyn bolady. Qazir yqtımal nusqalar qaralyp jatyr», - dedi shahar basshysy Alataý aýdany turǵyndarymen kezdesý kezinde.
Sonymen qatar, ol balabaqsha máselesine de toqtaldy.
Búgingi kúni Almaty qalasynda 1-6 jas aralyǵyndaǵy 41 200 bala kezekte tur. Jyl basynan beri jeke balabaqshalarda 1261 oryn paıdalanýǵa berildi.
«Nurkent» shaǵyn aýdanynda 320 oryndyq jáne «Saıaly» shaǵyn aýdanynda 160 oryndyq 2 balabaqsha salý josparda»,- dedi ol.
Megapolıste balalardyń mektepten tys bilim berý, sport jáne shyǵarmashylyq úıirmelerge tegin qatysýy úshin jergilikti bıýdjetten 8,2 mlrd teńge qarastyrylǵan.
