Almaty mektepterin oqýlyqpen qamtýǵa 2 mlrd 658 mln teńge bólindi
Bul týraly qoǵamdyq keńeste qalalyq Bilim berý basqarmasynyń basshysy Gúlnar Hodjabergenova aıtty.
Onyń aıtýynsha, QR Bilim berý týraly zańǵa sáıkes, memlekettik mekteptegi balalar 100 paıyz oqýlyqpen qamtylýǵa tıis.
«Bárimizdi tolǵandyratyn - oqýlyq máselesi. Jańartylǵan bilim berý mazmunyna sáıkes 3-6-8 synyptardyń jańa oqýlyqtary basylyp shyǵyp jatyr. Osyǵan oraı, oqýlyqtar men oqý-ádistemelik keshenderdi alýǵa qala bıýdjetinen 2 mlrd 658 mln teńge bólindi», - dedi Gúlnar Hodjabergenova.
Basqarma basshysy oqýlyqtar mazmunyna «Oqýlyq» respýblıkalyq ǵylymı praktıkalyq ortalyǵynda qurylǵan eksperttik komıssııa saraptama jasaıtynyn aıtty.
«Komıssııa quramyna ǵalymdar, belgili qoǵam qaıratkerleri, muǵalimder kiredi. Jańa oqýlyqtar eksperttik komıssııanyń sheshimimen engiziledi. QR BǴM oqýlyqtar tizimi týraly buıryǵy shyǵady. Sodan keıin tek osy tizim boıynsha kórsetilgen oqýlyqtarǵa mektepter tapsyrys beredi. Qazir oqýlyq satyp alý boıynsha konkýrstyq protsedýralar ótkizip jatyrmyz», - dedi ol.