Almaty mektepteri jyl sońyna deıin beınekameralarmen tolyq qamtylady
ALMATY. QazAqparat - Almaty mektepteri jyl sońyna deıin beınekameralarmen qamtylatyn boldy. Bul týraly Almaty qalasy Bilim salasynda sapany qamtamasyz etý departamentiniń basshysy Gúlnar Ermekbaeva onlaın brıfıng barysynda aıtty, dep habarlaıdy QazAqparat tilshisi.
Spıkerdiń aıtýynsha, 2021 jyldyń qańtarynan «Bilim berý júıesin tekserý barysynda tekserý paraqtary men qaýip dárejesin baǵalaý krıterııalaryn bekitý» týraly zań kúshine endi.
Qujatta bilim berý uıymdarynda beınekameralardyń bolmaýyna baılanysty jaýapkershilik qarastyrylǵan.
«Beınebaqylaýdyń bolmaýy óreskel ereje buzýshylyqqa jatady. Qazirgi tańda qalalyq Bilim basqarmasynyń habarlaýynsha, 207 jalpy bilim beretin mektep pen 15 ınternatty keshendi baqylaý júıesimen qamtý jobasy júzege asyrylýda. Tehnıkalyq mindetter boıynsha jumys jasalyp, QR Tsıfrlyq damý, ınnovatsııa jáne aeroǵarysh ónerkásibi mınıstrligine talqylaýǵa jiberildi»,- dedi ol.
Onyń aıtýynsha, tehnıkalyq tapsyrys nátıjesinde Tsıfrlandyrý basqarmasy jobany júzege asyrýǵa jumsalatyn qarajatty esepteıdi.
«Basqarma bergen aqparatqa sáıkes, Almatyda 11 221 kamera men tasa aımaqtarǵa 4990 kamera kerek eken. Mektepterde qazirdiń ózinde 7430 kamera bar», - dedi ol.
Gúlnar Ermekbava jobanyń bıyl júzege asatynyn aıtty.
«Bıyl beınekameralar túgel ornatylýy tıis. Sebebi, birinshi kezekte bul balalardyń qaýipsizdigi jáne mektepterdiń attestatsııasy», - dedi basqarma ókili.
