Almaty mektepteri oqýshylarǵa qashyqtan bilim berýge daıyn ba
ALMATY. QazAqparat –Almatydaǵy «Jańa Ǵasyr» №175 gımnazııanyń dırektory Gaýhar Mánekeeva onlaın formatta ótken jalpy respýblıkalyq pedagogıkalyq keńeste kóterilgen máseleler týraly aıtyp berdi, dep habarlaıdy QazAqparat tilshisi.
Gımnazııa dırektory Gaýhar Mánekeevanyń aıtýynsha, búgin ótken pedagogtar keńesine 100-den astam muǵalim, qamqorshylyq keńes músheleri, «Darin» onlaın platformasynyń qurýshysy qatysty.
Pedagogıkalyq keńeste jańa oqý jylyna daıyndyq, sabaq ótý protsesi talqylandy.
«Keńes barysynda qashyqtan ótkizetin sabaqty ázirleý algorıtmi, 1-4 synyp arasyndaǵy kezekshi synyp jumysy talqylandy. Muǵalimder bilim berý ınternet platformasyn paıdalaný erejesimen tanysty. Jańa oqý jylynda bilim alýshylardyń baǵalaý erekshelikteri de sóz boldy. Ata-analarymen tyǵyz baılanys ornatý kerektigi de aıtyldy»,– deıdi №175 gımnazııanyń dırektory Gaýhar Mánekeeva.
Onyń sózinshe, mektep jańa oqý jylyna 100 paıyz daıyn.
«Qashyqtan oqytý protsesin joǵary deńgeıde uıymdasqan túrde bastaǵaly otyrmyz. Gımnazııa kompıýter, noýtbýk, planshettermen qamtamasyz etti. Tehnıkalyq quraldar, ınternet bar. Muǵalimder oqýshylarǵa qashyqtan bilim berýge ázir. Turmysy tómen otbasynan shyqqan 155 balaǵa planshet beriledi. Oqýshylardyń bilimin baǵalaý elektrondy jýrnaldar arqyly júzege asyrylady»,– dep atap ótti gımnazııa dırektory .
