Almaty mektebinde perdege aqsha jınaý faktisi tekserilip jatyr

ALMATY. QazAqparat – Almaty mektebinde jalıýzıge aqsha jınalǵany týraly muǵalimniń janaıqaıy boıynsha tekserý bastaldy. Bul týraly Óńirlik kommýnıkatsııalar qyzmetiniń ókili Áıgerim Jumabekova aıtty, dep habarlaıdy QazAqparat tilshisi.

Almatynyń Jetisý aýdanynda ornalasqan №143 mektep-lıtseıiniń orys tili pániniń muǵalimi Lázzat Musanova Facebook-te mektep terezesine jalıýzı satyp alýǵa muǵalimder men ata-analar aqsha jınaǵanyn jazǵan bolatyn. Onyń aıtýynsha, ol sońǵy 14 myń teńgesin jalıýzı ornatatyn adamdarǵa berýge májbúr bolǵan.

Muǵalimniń jazbasy kópshilik arasynda qyzý talqyǵa tústi.

Sonymen qatar, pedagog QR Sybaılas jemqorlyqqa qarsy is-qımyl agenttiginiń tóraǵasy Alık Shpekbaevtan bul máselege aralasýyn ótindi.

Bul narazylyqtan soń №143 mektepke qalalyq Bilim berý basqarmasynyń basshysy Gúlnár Qojabergenova bastaǵan arnaıy komıssııa shyqqan.

«Qazir mektepte tekserý júrip jatyr. Qosymsha aqparat keıin habarlanady», - dedi Óńirlik kommýnıkatsııalar qyzmetinen.

Keıinirek L. Musanova bilim ordasynyń dırektory Gúlsara Baıedilova onyń 14 myń teńgesin qaıtarǵanyn jáne oqýshylar aqshanyń jınalǵanyn rastap bergenin jazdy.