Almaty medıtsınalyq saqtandyrý qory bólimshesiniń jumysy qalaı júzege asady
Qor dırektory Tileýhan Abaıldaev qurylymnyń jumysy týraly aıtyp berdi.
«Biz qazir adamdardy tirkeý naýqanyn júrgizip jatyrmyz. Adam sanyna qaraı kórsetiletin medıtsınalyq qyzmet kólemin anyqtap jatyrmyz. Bul jumystarǵa arnaıy qurylǵan komıssııa aralasyp jatyr. Komıssııa quramyna «Atameken» kásipkerler palatasynyń ókilderi, kásipodaq músheleri, qoǵam qaıratkerleri kiredi. Bıyl shtatta 14 adam bar. 2018 jyldyń 1 qańtarynan bastap kórsetiletin medıtsınalyq qyzmet qunyn tereńirek zertteıtin bolamyz. Sondyqtan, shtat keńeıedi», - dedi Tileýhan Abaıldaev.
Onyń aıtýynsha, qor kepildendirilgen saqtandyrý medıtsınalyq kómegi aıasynda qarjylandyrý júrgizedi.
«Kelesi jyldan bastap qorda azamattardyń aryzy qaralmaıdy. Bul suraqtyń bári Qalalyq Densaýlyq saqtaý basqarmasy, medıtsınalyq qyzmet aqysyn tóleý departamentiniń quzyryna beriledi.
Bul salada jekemenshik uıymdardyń tájirıbesi mol.Bıyl bazalyq tizim jasaldy. Qosymsha 65 uıym MÁMS aıasynda qyzmet kórsetýge ynta bildirdi»,- dedi ol.
Búginde Almatyda qala turǵyndaryn emhanaǵa tirkeý júrgizilip jatyr. Tirkelgen azamattar alǵashqy medıtsınalyq-sanıtarlyq kómekti tegin alady.
Almatyda turatyn sheteldik azamattar, Qazaqstan azamattary MÁMS aıasynda qyzmet kórsetetin medıtsınalyq uıymdy ózderi tańdaıtyn bolady. Aktsııa 12 qarashaǵa deıin jalǵasady.
QR Elbasy Nursultan Nazarbaev «Qazaqstannyń úshinshi jańǵyrýy: jahandyq básekege qabilettilik» joldaýynda bilim berý júıesimen qatar densaýlyq saqtaý júıesi de ózgerýge tıis ekendigin aıtqan bolatyn.
«Bıylǵy 1 shildeden memlekettiń, jumys berýshilerdiń, azamattardyń ortaq jaýapkershiligine negizdelgen mindetti medıtsınalyq saqtandyrý júıesi (MMSJ) engizile bastaıdy. Bul júıeniń tıimdiligi álemdik tájirıbe arqyly dáleldengen.
Medıtsınalyq saqtandyrý júıesine qatysýshylarǵa keń aýqymdaǵy medıtsınalyq qyzmetter usynylady. Oǵan halyqtyń áleýmettik álsiz toptarynyń qatysýyna memlekettik qoldaý kórsetiledi.
Úkimet qajetti deńgeıde densaýlyq saqtaý salasyn aqparattandyrýy kerek. Básekelestikti damytý úshin jeke menshiktegi medıtsına mekemelerine MMSJ júıesi aıasynda teń jaǵdaı týǵyzý kerek.
Úkimetke jáne ákimderge keń aýqymdy aqparattyq-túsindirý jumysyn júrgizýdi tapsyramyn», - degen bolatyn memleket basshysy.
