Almaty medıtsınalyq qaýymy medıtsına isiniń úzdigin eske aldy
ALMATY. QAZAQPARAT - Elimizdiń densaýlyq saqtaý salasynyń ardagerlerine Amangeldi Dúısekeuly Dúısekeevtiń kim ekenin túsindirý qajet emes.
Densaýlyq saqtaý isiniń osyndaı tájirıbeli uıymdastyrýshysy, mártebeli ári jaryq juldyzy, tálimger jáne 40 jyldan asa qazaq xalqynyń densaýlyǵyn qorǵaý júıesine qyzmet etken qoǵam qaıretkeri báriniń esinde. A.Dúısekeev 1942 jyly Uly Otan soǵysy jyldarynda Qyzylorda oblysynyń Jańa Qazaly qalasynda dúnıege kelgen. Mektepti, odan ári Almaty medıtsınalyq ınstıtýtynyń pedıatrııa fakýltetin támamdap, birden 23 jasynan bastap Almaty oblysynyń «Kóktal-Arasan» balalar aýrýxanasynyń bólimshe meńgerýshisi bolyp qyzmet atqardy. 26 jasynda, balalar xırýrgııasy mamandyǵyn bitirgennen keıin sol jyldary elimizdegi eń iri klınıkasy bolyp tabylatyn Almatydaǵy №1 qalalyq birlesken balalar klınıkalyq aýrýxanasynda shuǵyl xırýrgııa bólimshesiniń xırýrg dárigeri bolyp jumys istedi. 1971 jyldan bastap, balalar xırýrgııasy boıynsha klınıkalyq ordınatýrany aıaqtaǵan soń AMMI kafedrasynyń assıstenti boldy. 1974-1981 jyldary - Almaty №1 qalalyq balalar klınıkalyq aýrýxanasy bas dárigeriniń emdeý isi jónindegi orynbasary boldy, 1981 jyldan bastap - Almaty №2 qalalyq balalar klınıkalyq aýrýxanasynyń bas dárigeri laýazymyn atqardy.
1985 jyly Amangeldi Dúısekeuly, óziniń uıymdastyrýshylyq qabiletteriniń arqasynda Almaty qalalyq densaýlyq saqtaý bóliminiń meńgerýshisi bolyp taǵaıyndalady. Bul kezeńde densaýlyq saqtaý bıýdjeti qaldyq esebinen qalyptasatyn kúrdeli ekonomıkalyq toqyraý jyldary bolatyn. Biraq qalanyń densaýlyq saqtaý júıesi medıtsınalyq kómek kórsetýdi únemi jetilip otyrdy. Alǵashqy kúndizgi statsıonarlar quryla bastady, naýqastardy dıspanserleý sapasy joǵarylady, bosandyrý uıymdary jaraqtandy. Jańa densaýlyq saqtaý nysandary iske qosyldy.
Amangeldi Dúısekeev 1991 jyly «Aqsaı» respýblıkalyq balalar klınıkalyq aýrýxanasynyń bas dárigeri qyzmetinde bolady. Bul memleketimizdegi eń ozyq mekemelerdiń biri edi. Onda balalarǵa kómek kórsetýdiń zamanaýı mamandandyrylǵan túrleri engiziletin. Naýqastar shalǵaı óńirlerden kelip, joǵary sapaly kómek alatyn. Al 1994 jyldan bastap - Qazaqstan Respýblıkasy Densaýlyq saqtaý mınıstriniń birinshi orynbasary laýazymyn atqarady. Bul kezeńde xalyqtyń densaýlyǵyn qorǵaý júıesin reformalaý medıtsınalyq jáne farmatsevtıkalyq qyzmetter naryǵyn damytý, mindetti medıtsınalyq saqtandyrýǵa turý, áleýmettik máni bar aýrýlarmen kúresý máselesinde vedomstvoaralyq ózara is-qımyl jasaýdy nyǵaıtý arqyly júzege asyryldy. Medıtsınalyq uıymdardy jekeshelendirý, jelini ońtaılandyrý, emdeý-profılaktıkalyq qyzmet sapasyn jetildirý, xalyqaralyq seriktestikti damytý jumystary bastaldy.
1997 jyldan bastap QR Densaýlyq saqtaý mınıstrligi dərimen qamtý jəne medıtsınalyq tehnıka departamentin basqarady.
1997-2004 jyldary Almaty oblystyq densaýlyq saqtaý basqarmasynyń bul kisige senip tapsyrylýy da bilikti uıymdastyrýshy ekendigin kórsetse kerek.
38 ǵylymı maqalanyń, 1 monografııalyq avtory A.Dúısekeev óz isiniń has mamany bolǵan.
Óz eligiń patrıoty retinde 2004-2007 jyldary Parlament Məjilisiniń depýtaty bop saılanǵan.
Osyndaı eren azamattyń aramyzdan ketkenine 2 jyl boldy. 15 qazanda onyń jasy 75-ke tolar edi. Ózi aýyr naýqaspen kúrese otyryp artyndaǵy myńdaǵan urpaǵyna shəkirtterine óshpes bilim murasyn qaldyrdy.
Búginde əriptesteri Amangeldi Dúısekeulyn zor saǵynyshpen eske alady.
