Almaty máslıhaty 2022 jylǵa deıin jol jóndeýge 5,6 mlrd teńge bóldi
ALMATY. QazAqparat - Almaty ákimdigi qala kóshelerindegi joldardy jóndeýge merdigerlermen 4,5 jylǵa kelisim jasasyp jatyr, dep habarlaıdy QazAqparat tilshisi.
Máslıhat depýtattary búgin «Joldy aǵymdaǵy jóndeý» jobasyn bekitti. Joba memlekettik-jekeshelik áriptestik aıasynda júzege asylady.
Almaty qalasynyń joldaryna 2022 jylǵa deıin 4 merdiger jaýap beredi.
«Bul joba - elimizdegi eń aldyńǵy qatarly joba. Jekemenshik ınvestorlarmen birige jasalǵan jumysta jóndeý sapasy artatynyna senimdimiz. Jumystar 4,5 jylda 2022 jylǵa deıin aıaqtalýy tıis. Jobada 4 lot bar. Ár lotta 2 aýdan bólingen»,- dedi qalalyq kólik jáne avtomobıl joldary basqarmasynyń ókili Nurjan Isabekov.
Jobanyń jalpy quny 5,6 mlrd teńge. Uzaqmerzimdi baǵdarlama aıasynda qaladaǵy barlyq joldarynda 60 asa jumys túri oryndalady.
