Almaty-Máskeý baǵyty boıynsha tolyǵymen jańartylǵan poıyz jolǵa shyqty
ASTANA. Qyrkúıektiń 10-y. QazAqparat - Búgin Almaty temirjol vokzalynan «Almaty -Máskeý» baǵyty boıynsha tolyǵymen jańartylǵan №7/8 poıyz jolǵa shyqty. Jolaýshylar poıyzynyń bul quramasy otandyq kásiporyndarda qaıta jóndeýden ótken.
Poıyz quramyndaǵy vagondar 20 - 28 jyl boıy qoldanysta keledi. QR Kólik jáne kommýnıkatsııa mınıstrligi baspasóz qyzmetiniń málimetinshe, Reseı men Qazaqstannyń iri megapolısterin baılanystyratyn halyqaralyq temirjol kóligi «Alataý» dep ataldy.Bul poıyz zamanaýı talaptarǵa saı. Onda jolaýshylarǵa eń joǵary deńgeıde qyzmet kórsetiledi. Ár kýpede jaıly ınterer men yńǵaıly dıvan, radıo jáne DVD - oınatqyshy bar teledıdar ornatylǵan. Jolaýshylardyń bos ýaqytyna jáne turmystyq qyzmettiń ýaqytynda kórsetilýine basa nazar aýdarylǵan. Poıyzda olarǵa túrli ústel oıyndary, shaǵyn kitaphana, tigin jáne tazalyq jınaqtary usynylady. Sonymen qatar jolaýshylar gazet, jýrnaldardyń jańa nómirlerin oqı alady. «Alataý» poıyzy 3 tıpti (SV, kýpe, platskart) jáne meıramhana vagony bar. Almaty - Máskeý baǵyty boıynsha aptasyna 4 quram qatynaıdy. Jyl sońyna deıin qosymsha jańartylǵan úsh quram iske qosylmaq. Almaty men Máskeý qalalarynyń ara qashyqtyǵy 4015 shaqyrym. Jolǵa ketetin ýaqyt 78 saǵat 40 mınýt.
«Qyzmet sapasy artqan ári yńǵaıly jolaýshylar poıyzy kópshiliktiń kóńilinen shyǵady. Vagondardy qaıta jóndeýden ótkizý kezinde onyń syrtqy jáne ishki dızaınyna kóp kóńil bólingen. Máselen, vagondardy daıyndaý kezinde zamanaýı materıaldar men tehnologııa paıdalanyldy. Vagonnyń syrtqy jaǵyn kógildir túske boıap, sary túspen ulttyq oıý túsirgen. Barlyq vagondarda metall plastıginen jasalǵan terezeler ornatylǵan. Jatyn jáne kýpe vagonyndaǵy eski perdeler roll-perdelermen almastyrylǵan. Sóreler qatty tartylyp jasandy bylǵaryny almastyratyn sapaly materıaldarmen qaptalǵan», delingen taratylǵan habarlamada.
