Almaty marafonynan jınalǵan qarjyǵa sport kesheni salyndy

Bul týraly búgin Almaty marafonyn uıymdastyrý komıtetiniń baspasóz qyzmetinen habarlady.

«Almaty marafony - bul tek buqaralyq sport sharasy ǵana emes, sonymen qatar qaıyrymdylyq sharasy. 2015 jyly biz sóıleý qabileti nashar balalarǵa arnalǵan №9-shy mektep-ınternatyna kómektesýdi uıǵardyq. Onda zamanaýı sport kesheni salyndy. Jańa oqý jylynda sóıleý qabileti óte nashar balalar belsendi oıyndar oınap, sportpen shuǵyldana otyryp, tolyqqandy damı alatyn bolady», -dedi Almaty marafonynyń dırektory Saltanat Qazybaeva.

Óz kezeginde mektep-ınternattyń dırektory Irına Zlokazova IV Almaty marafonyna sheksiz rıza ekendigin bildirdi.

«№9 mektep-ınternatynyń pedagogıkalyq jáne balalar ujymy Almaty marafonynyń qaıyrymdylyq kómegine sheksiz alǵysyn bildiredi. Bizdiń balalar jańa sport alańshasyna óte muqtaj edi. Almaty marafonyna kórsetken kómegi úshin, sonymen qatar jarna tólep osy tamasha sport kesheniniń qurylysyna úles qosqan barsha azamattarǵa alǵysymyzdy bildiremiz», - dedi ol.

Sport kesheniniń qurylysy bıyl maýsym aıynda bastalyp, tamyzda aıaqtalyp otyr. Onda balalar fýtbol, basketbol jáne voleıbol oınaı alady. Sonymen qatar alańsha janyna beltemirler, qyrly bóreneler jáne basqa da sport quraldary ornatylǵan.

Erteń jańa nysannyń ashylý rásimi ótedi.