Almaty marafony óte me
ALMATY. QazAqparat – Almatyda jyl saıyn sáýirde ótetin «Almaty marafony» sporttyq sharasy bıyl uıymdastyryla ma? Bul saýalǵa uıymdastyrý komıteti jaýap berdi, dep habarlaıdy QazAqparat tilshisi.
Sporttyq sharany uıymdastyrýshylar dúnıe júzinde jańa vırýstyń taralýy týraly aqparatty muqııat baqylaýda ustap otyr. Alaıda basty júgirý oqıǵasyna daıyndyq oıdaǵydaı júrip jatyr.
QR Densaýlyq saqtaý mınıstrliginiń resmı málimdemesi boıynsha, búginde Qazaqstanda koronavırýs aýrýy tirkelgen joq, alaıda, úkimet elimizdiń aýmaǵynda aýrý juqtyrǵan azamattar anyqtalǵan jaǵdaıǵa arnalǵan is-qımyl josparyn ázirledi.
«Qazir is-sharany ótkizbeımiz dep josparlap otyrǵan joqpyz. Jarysqa daıyndyq jalǵasyp jatyr. Qatysýshylardyń 95%-ǵa jýyǵy – Qazaqstan azamattary, sonyń ishinde elimizde jumys isteıtin sheteldik mamandar. Pandemııa týraly habarlandyrý jáne jappaı is-sharalardy ótkizbeý týraly jarlyq shyqqan jaǵdaıda, biz jarysty ótkizbeýge nemese keıingi qaldyrýǵa quqyly bolamyz, ol jaıynda resmı derekkózderimizde habarlaımyz. Qatysýshylardyń densaýlyǵy men qaýipsizdigi burynǵysha bizdiń basty nazarymyzda. Jaǵdaı jaqynda durystalady dep úmittenemiz jáne barlyq naýqastardyń tez arada saýyǵyp ketýin tileımiz. Azamattardan túsinistikpen qarap, jalǵan aqparat taratpaýdy suraımyz», - dedi «Almaty marafonynyń» dırektory Saltanat Qazybaeva.
Koronavırýstyń kesirinen Qazaqstan aýmaǵyna kirýge tyıym salynǵan elderdiń qatysýshylarynyń jarnasy «Almaty marafon» 2021 jarysyna aýystyrylady.
Buǵan deıin Tokıoda halyqaralyq marafon resmı túrde toqtatyldy. 1 naýryzda marafon tek qana Elite sanatyndaǵy 200 kásipqoı úshin ótkizildi. Birqatar basqa elderde jappaı is-sharalar toqtatyldy.
«Almaty marafony» uıymdastyrý komıteti barlyq qatysýshylardan aýrýdyń aldyn alýdyń negizgi sharalaryn ustanýdy – jeke gıgıenany saqtaýdy jáne kez kelgen vırýstyq juqpaly aýrýlardy, onyń ishinde tumaýdy, JRVI, JRZ juqtyrǵan adamdarmen qarym-qatynasty shekteýdi, sondaı-aq koronavırýstyq juqpaly aýrýdy juqtyrý jaǵdaılary anyqtalǵan elderge saıahattaýdan aýlaq bolýdy suraıdy.
«Almaty marafony» 2020 jyldyń 19 sáýirinde Almatyda ótedi dep josparlanǵan.
Byltyr bul sharaǵa alys jaqyn shetelden sportshylar kelip, 17000 adam qatysqan bolatyn.
