«Almaty Marafony» kúni birqatar joldar jabylady
ALMATY. QazAqparat - Almatyda júgirý marafony ótetin kúni birqatar joldar jartylaı jabylady, dep habarlaıdy QazAqparat tilshisi.
Uıymdastyrý komıtetiniń aıtýynsha, marafon 23 sáýir kúni saǵat 07.00-den 14.00 aralyǵynda ótedi. Osy ýaqytta is-shara ótetin joldar boıynda kólikter úshin qozǵalys shekteledi.
Jospar boıynsha, Ál-Farabı kóshesiniń soltústik jaǵynan Shyǵys aınalma jolynyń batys bóligi, Abaı dańǵylynyń ońtústik bóligi men Seıfýllın kóshesiniń Abaı dańǵylymen qıylysatyn tusynan Ál-Farabı kóshesine deıingi bóligi avtokólikter úshin jabyq bolady.
IV «Almaty Marafonyna» qazirgi ýaqytta 13 myń adam tirkeldi.
«Júgirýdi unatatyndar úshin birneshe qashyqtyq usynylyp otyr. Tolyq marafon - 42 shaqyrym 195 metrdi, jarty marafon - 21 shaqyrymdy, spýtnık júgirý - 10 shaqyrymdy, skandınavııalyq úlgidegi júris - 10 shaqyrymdy, balalar úshin júgirý qashyqtyǵy 3 shaqyrymdy quraıdy. Joldardyń jabylýyna baılanysty osy kúngi qozǵalys baǵytyn aldyn ala josparlaýdy suraımyz», - deıdi «Almaty Marafonynyń» dırektory Saltanat Qazybaeva.
Onyń aıtýynsha, kólik qozǵalysy shara aıaqtala salysymen saǵat 14.00-de qalpyna keltiriledi.
Marafonǵa qatysýshylardan jınalǵan aqsha qarajaty aýyr naýqasty 500 balanyń em-domyna jumsalmaq.
