«Almaty marafony» aıasynda múmkindigi shekteýli 1500 balaǵa kómek kórsetiledi
ALMATY. QazAqparat - 2017 jylǵy «Almaty marafony» sharasy aıasynda jınalǵan qarajat Almatynyń 6 arnaıy oqý ornyndaǵy áleýmettik jobalardy iske asyrýǵa jumsalady. Bul týraly uıymdastyrý komıtetinen habarlandy.
Atap aıtqanda, estý qabileti nashar balalarǵa (estimeıtin balalarǵa) arnalǵan № 1 arnaıy (túzetý) mektep-ınternaty, aıaq-qoly kemtar balalarǵa arnalǵan № 2 arnaıy (túzetý) mektep-ınternaty, N.Ostrovskıı atyndaǵy zaǵıptar men kózi nashar kóretin balalarǵa arnalǵan № 4 arnaıy mektep-ınternaty, sóıleý qabileti óte nashar balalarǵa arnalǵan № 9 arnaıy (túzetý) mektep ınternaty, týberkýlezdiń báseńdeý túrlerimen aýyratyn balalarǵa arnalǵan arnaıy sanatorııalyq úlgidegi № 15 mektep-ınternaty, kórý qabileti buzylǵan balalarǵa arnalǵan №13 túzetý balabaqshasy qajetti qural-jabdyqpen qamtylady.
«Altynshy «Almaty marafonynan» jınalǵan qarjyǵa biz birden alty balalar mekemesine kómek jiberemiz. Bizdiń aýqymdy is-sharamyzdyń qarajatynyń kóp bóligi osy mekemelerdegi sport zaldary men alańdaryn qurý men jabdyqtandyrýǵa jumsalady, - dedi «Almaty marafony» uıymdastyrý komıtetiniń dırektory Saltanat Qazybaeva.
Nátıjesinde bul mekemelerde skalodromdar, fýtbol alańdary, sensorlyq bólmeler men sport jabdyqtary paıda bolady.
Onyń aıtýynsha, sharǵa jarysqa qatyspaıtyn kez-kelgen adam da óz úlesin qosa alady. Ol úshin kez-kelgen somany arnaıy esep-shotqa aýdarsa ǵana bolǵany. Qaıyrymdylyq sharasyna úles qosý úshin myna siltemege https://www.almaty-marathon.kz/ru/charity/qiwi ótý kerek.
