Almaty mańyndaǵy ushaq apatynyń sebepteri jaqynda belgili bolmaq
ASTANA. QazAqparat - Almaty túbinde bolǵan CRJ-200 ushaǵynyń apatyna qatysty tergeý nátıjeleri bıylǵy jyldyń kókteminde jarııalanady. Bul týraly búgin QR Prezıdenti janyndaǵy Ortalyq kommýnıkıtsııalar qyzmetindegi baspasóz máslıhatynda QR Kólik jáne kommýnıkatsııalar vıtse-mınıstri Azat Bekturov málim etti.
Onyń sózine qaraǵanda, «SKAT» áýe kompanııasyna qarasty CRJ-200 ushaǵynyń apatqa ushyraýynyń sebepterin tergeý boıynsha komıssııa adamı faktor nusqasyna mán berýde. Sonymen qatar vıtse-mınıstr atalǵan oqıǵany tergeý amaldarynyń aıaqtalýǵa jaqyndaǵanyn atap ótti. Áýe apatyn tekserip júrgen sarapshylardyń kelesi otyrysy osy aqpan aıynda ótedi. Osydan keıin komıssııanyń sońǵy otyrysy uıymdastyrylady.
Esterińizge sala keteıik, CRJ-200 ushaǵy 2013 jyldyń 29 qańtarynda Almaty áýejaıyna qonýǵa baǵyt alǵanda apatqa ushyraǵan. Onyń saldarynan 21 adam - 16 jolaýshy men 5 ekıpaj múshesi qaza boldy.
