Almaty mańyndaǵy ushaq apatyna baılanysty Qazaqstannyń Bas múftıi kóńil aıtty
ASTANA. 29 qańtar. QazAqparat - Almaty mańyndaǵy ushaq apatyna baılanysty Qazaqstan musylmandary Dinı basqarmasynyń tóraǵasy, Bas múftı, sheıh Ábsattar qajy Derbisáli qaza bolǵandardyń týystaryna kóńil aıtý jedelhatyn joldady.
«Asa qamqor erekshe meıirimdi Allanyń atymen bastaımyn!
Ústimizdegi jyldyń 29 qańtarynda tús aýa Kókshetaý-Almaty baǵyty boıynsha qatynaıtyn SKAT áýekompanııasy jolaýshylar ushaǵynyń Almaty mańynda apatqa ushyraǵany týraly sýyq habar tarady. Áýe kemesinde bolǵan 20-22 otandas baýyrlarymyzdyń qaza bolǵanyn estip, qabyrǵamyz qaıysyp, barsha halqymyz qasyret shegýde. Opat bolǵandardyń týǵan-týystaryna, jaqyn-juraǵattaryna qaıǵylaryna ortaqtasyp, kóńil aıtamyn. Bir Alla jar bolsyn!
Qaıǵyly oqıǵa jetisimen, elimizdegi barlyq meshit ımamdaryna baqılyq bolǵandarǵa Alladan medet, paıǵambardan shapaǵat tilep, duǵa etýge pármen berdim.
Múbarak Quranda: «Árıne, senderdi qayip-qater, asharshylyq jáne maldardan, jandardan sondaı-aq ónimderden kemitý arqyly synaımyz, (Muhammed ǵ.s. sondaı jaǵdaılarda) sabyr etýshilerdi qýandyr! Qashan olarǵa bip qaıǵy jetse: «Olar shyn máninde biz Alladan keldik jáne Allaǵa qaıtyp oralamyz dedi» («Baqara» súresi, 155-156-aıattar), - delingen.
Iá, adam ómiri ólsheýli. Kimniń qashan dám-tuzy taýsylatyny tek bir Allaǵa aıan. Jalǵan ómirdi qamshynyń sabyna teńegen ata-babalarymyz bes kúndik dúnıeni jaqsylyqpen ótkizýdi ósıet etken. Paıǵambarmyz da (s.ǵ.s.) myna jalǵanda jolaýshydaı ómir súrýdi abzal kórgen. Hakim Abaıdyń da aıtary osy: «Adamzat - búgin adam, erteń - topyraq».
Jaratýshy Iemiz elimizdi, jerimizdi tosynnan keletin appattardan saqtaǵaı! Alla Taǵala qazanyń artyn qaıyrly etkeı!»- delingen Bas múftıdiń kóńil aıtý jedelhatynda.
