Almaty mańyndaǵy ushaq apaty: aýrýhanada jatqan 6 adamnyń jaǵdaıy aýyr
Ushaq apatynan barlyǵy 68 adam jaraqat aldy, olardyń 51-i aýrýhanaǵa jatqyzyldy, onyń toǵyzy bala. 7 adam alǵashqy medıtsınalyq kómekten keıin ambýlatorııalyq baqylaýǵa jiberildi.
12 adam qaza tapty. Olardyń 8-i oqıǵa ornynda, 2-ýi tasymaldaý kezinde jáne 2 eresek adam alǵan jaraqattarynan №4 qalalyq klınıkalyq aýrýhanada qaıtys boldy.
«Qazirgi ýaqytta aýrýhanalarda 37 naýqas jatyr, olardyń 6-nyń jaǵdaıy turaqty aýyr, 31-niń jaǵdaıy ortasha. Almaty qalalyq jedel shuǵyl kómek kórsetý aýrýhanasynda jatqan 7 adam jáne №4 qalalyq klınıkalyq aýrýhanadan 1 naýqas úıine shyqty. Olar ary qaraı ambýlatorııalyq em qabyldaıdy. Sonymen qatar, ortalyq klınıkalyq aýrýhanadan bir naýqas, Almaty kópsalaly klınıkalyq aýrýhanasynan eki eresek jáne bir bala úılerine shyǵaryldy», - dep habarlady basqarmadan.
Qazirgi ýaqytta shuǵyl medıtsınalyq járdem ortalyǵynda 8 bala; № 4 qalalyq klınıkalyq aýrýhanasynda 17 eresek adam; Almaty qalalyq jedel shuǵyl kómek kórsetý aýrýhanasynda 5 eresek adam; ortalyq qalalyq aýrýhanada 3 eresek; Almaty kópsalaly klınıkalyq aýrýhanasynda 3 eresek adam; «Prıvat» klınıkasynda 1 naýqas jatyr.
Aýrýhanalardyń jansaqtaý bóliminde 6 naýqas jatyr. Barlyǵy eresek adamdar. 21 adamǵa ota jasaldy. Onyń ishinde 2 bala bar. Medıtsınalyq kómek, dıagnostıkalyq tekserýler, dári-dármekpen qamtamasyz etý tolyq kólemde kórsetilip jatyr.
«Kún saıyn Almaty jáne Nur-Sultan qalalarynyń jáne respýblıkalyq medıtsına uıymdarynyń dárigerleri konsılıým ótkizedi», - dep tolyqtyrdy basqarma baspasóz qyzmeti.
Sondaı-aq, ushaq apatynan zardap shekkendermen jáne qaıtys bolǵandardyń otbasylarymen 57 psıholog jumys istep jatyr. Kezekshi psıhologtardyń kestesi jasalyp, barlyq nysandarǵa taratyldy.
