Almaty mańyndaǵy qoqys polıgonynan shyqqan órt tek besinshi kúni sóndirildi
ALMATY. QazAqparat – Almaty mańyndaǵy qoqys polıgonynan shyqqan órt tek besinshi kúni sóndirildi, dep habarlaıdy QazAqparat tilshisi.
«15 maýsym kúni saǵat 14: 00-de Almaty oblysy Іle aýdanyndaǵy polıgonynan shyqqan órt oqshaýlandy. Qyzyl jalynnyń taralý qaýpi seıildi. Sóndirý jumystary táýlik boıy júrgiziledi. Tilsiz jaý kóp mólsherde qum men sý sebý arqyly aýyzdyqtaldy. Ot tutanǵanan bastap polıgonǵa barlyǵy 25 myń tekshe metrden astam qum men 5,5 myń tekshe metr sý jetkizildi», - dep habarlady Almaty oblysynyń Tótenshe jaǵdaılar departamenti.
Órtti sóndirýge TJD, Іle aýdany ákimdigi, «ADK Taza Álem» JShS jáne «Alataý-Qus» zaýytynan 100-den astam adam, 40 tehnıka jáne Mı-8 tikushaǵy jumyldyryldy.
Oqıǵa ornynda arnaıy qurylǵan jedel shtab jumysyn jalǵastyrýda. Aýdan ákimdigi janar-jaǵarmaı jetkizý men órt sóndirýshilerge tamaq uıymdastyrdy.
Tótenshe jaǵdaı departamentiniń málimetinshe, 13 maýsymdaǵy jaǵdaı boıynsha órt 7 ga jerdi sharpyǵan. Qazir jalpy janyp jatqan aımaqtyń (6 ga) shamamen 85% oqshaýlandy.
«Bastapqyda qoıý tútin saldarynan órttiń naqty qansha jerge jaıylǵanyn anyqtaý múmkin bolmady. Qabyldanǵan sharalardyń arqasynda polıgonnyń búkil aýmaǵyna (34,4 ga) órttiń taralýyna jol berilmedi», - dep túsindirdi TJD.
Eske salaıyq, Іle aýdanyndaǵy Almaty-Óskemen tas jolynyń (35 km) qoqys polıgonyna qatty qaldyqtardyń tutanǵany týraly habarlama 10 maýsymda saǵat 14.26-da oblystyq tótenshe jaǵdaılar basqarmasyna túsken bolatyn.
Keıin qoqys polıgonyndaǵy órtten Almaty-Qapshaǵaı trassasynda 8 kó lik soqtyǵysty.
Sondaı–aq, órtti sóndirýge 3 tonna sý tasymaldaıtyn qurylǵysy bar MI-8 tikushaǵy qosyldy.
