Almaty mańyndaǵy aýyl turǵyndaryn ekologııa máselesi alańdatady
ALMATY. QazAqparat - Almatyǵa irgeles ornalasqan Qarasý yqsham aýdanynda ashyq aspan astyndaǵy jazǵy sahna ashyldy, dep habarlaıdy QazAqparat tilshisi.
Qarasý yqsham aýdanynda 15 myńǵa jýyq adam turady. Buryndary megapolıstegi oıyn-saýyq ortalyqtaryna jetý qıynǵa soǵatyn bolǵandyqtan, jergilikti halyq kóshede serýen qurýmen shekteletin.
Endi eriktilerdiń uıymdastyrýymen Qarasý ózeni janynan uıymdastyrylǵan demalys orny turǵyndardyń mádenı ortalyǵyna aınalmaq.
«Aýdanymyzdyń kórki sanalatyn jáne onymen attas Qarasý ózeni bar. Ózenniń ekologııalyq jaǵdaıyna turǵyndardyń nazaryn aýdarý maqsatynda jaǵalaýdan demalys ornyn ashtyq. Bul jerde jaz boıy merekelik sharalar ótkizilip, balalarǵa arnalǵan túrli oqý úıirmeleri uıymdastyrylady. Óskeleń urpaqty tabıǵatty súıýge tárbıelep, eresekterdi tabıǵat aıasynda demalýǵa tartamyz. Qorshaǵan ortany tazalap, ózendi kórkeıtýde turǵyndarynyń belsendiligin oıatamyz degen oıdamyz», - dedi eriktilerdiń biri Sergeı Vasılev.
Eriktilerdiń aıtýynsha, is munymen toqtap qalmaıdy. Josparda aýdan ınfraqurylymyn jetildirip, mádenı oshaqtar sanyn kóbeıtý sharalary bar.
