Almaty mańynda jol apatynan polıtsııa qyzmetkeri qaza tapty
ALMATY. QazAqparat – Almaty oblysy aýmaǵynda polıtsııa qyzmetkeri jol apatynan kóz jumdy, dep habarlaıdy QazAqparat tilshisi.
Jol apaty búgin tańǵy saǵat toǵyz shamasynda Almaty oblysynyń Qarasaı aýdanynda boldy
Almaty qalalyq Polıtsııa departamentiniń málimetine sáıkes, Kóldi-Jalpaqsaı tas jolynda «Mazda-626» avtokóliginiń júrgizýshisi rýlge ıe bola almaı, joldyń qarsy betine shyǵyp ketip, 22 jastaǵy Almaty qalasy patrýldik polıtsııasynyń ınspektory Nádir Qalymov tizgindegen «Lada Granta» avtokóligimen soqtyǵysqan. Soqqy ınertsııasymen «Lada» jol shetine qaraı ushyp ketip, aǵashqa soǵylǵan.
«Polıtsııa kishi serjanty N. Qalymov túngi aýysymnan úıine qaıtyp kele jatqan, biraq ol úıine sol kúıi jete almady: polıtseı alǵan jaraqattarynan oqıǵa ornynda kóz jumdy. Ártúrli dene jaraqattaryn alǵan «Mazda-626» kóliginiń júrgizýshisi aýrýhanaǵa jetkizildi», - dep habarlady polıtsııadan.
Atalǵan fakti boıynsha Almaty oblysy PD Qarasaı aýdanynyń polıtsııa basqarmasy QR Qylmystyq kodeksiniń 345-baby, 3-bóligi boıynsha tergeý júrgizedi.
Polıtsııa kishi serjanty Nádir Qalymov ishki ister organdarynda 2019 jyldyń qyrkúıeginen bastap qyzmet etti. Onyń artynda anasy men aıaǵy aýyr kelinshegi qaldy.
