Almaty mańynda ushaq soǵylǵan úı zańsyz salynǵan - Talǵar aýdanynyń ákimdigi
TALDYQORǴAN. QazAqparat - Almaty mańynda ushaq soǵylǵan úı zańsyz salynǵan. Talǵar aýdany ákiminiń baspasóz qyzmeti bergen resmı málimetke sáıkes, birinshiden ol jer ýchaskesine úı salýǵa múldem bolmaıdy, ekinshiden úıdiń qojaıyndary ǵımarat jobasyn ákimdikpen kelispegen, tanystyrmaǵan, dep habarlaıdy QazAqparat tilshisi.
«Talǵar aýdanynyń sáýlet jáne qala qurylysy bólimimen bul úıge sáýlet-josparlaý tapsyrmasy berilmegen, joba kelisilmegen jáne salynǵan obektini paıdalanýǵa qabyldaý aktisi tirkelmegen. Ǵımarat óz betimen salynǵan qurylys. Úı eldi meken sheginde ornalasqan, alaıda jer ýchaskesi sýarmaly jer bolǵan. Jer kodeksine sáıkes munda turǵyn úı salýǵa jol berilmeıdi», - delingen atalǵan vedomstvonyń resmı málimetinde.
Sondaı-aq, jeke qurylys salý zańdylyǵyn zerdeleý úshin qurylǵan jumys toby áli óz jumysyn aıaqtaǵan joq. Talǵar aýdany ákiminiń baspasóz qyzmetiniń habarlaýynsha, sol komıssııa tolyq sheshim shyǵarady.
Esterińizge sala keteıik, 27-shi jeltoqsan kúni Almaty mańynda «BekAir» áýe kompanııasynyń ushaǵy apatqa ushyrady. Áýe kemesinde 93 jolaýshy men 5 ekıpaj múshesi bolǵan. 12 adam qaza boldy. Apatqa ushyraǵan ushaq Almatydan Nur-Sultan qalasyna baǵyt alǵan.
