Almaty mańynda polshalyq týrıstiń múrdesin taýdan alyp shyǵý operatsııasy aıaqtaldy (FOTO)
ALMATY. QazAqparat- Almaty mańyndaǵy Talǵar shatqalynda tabylǵan polshalyq týrıstiń múrdesin taý qursaýynan alyp shyǵý operatsııasy aıaqtaldy. Bul týraly búgin Almaty q. TJD resmı ókili Sandýǵash Baımuhanbetova málimdedi.
Esterińizge sala ketelik, keshe aýa raıynyń qolaısyzdyǵy jáne tikushaqty qoldaný múmkin bolmaǵandyqtan, sondaı-aq, marqumnyń týystarynyń ótinishi boıynsha polshalyq týrıstiń múrdesin Talǵar shatqalynan jaıaý alyp túsý týraly sheshim qabyldanǵan bolatyn.
«QR ІІM Tótenshe jaǵdaılar komıteti Respýblıkalyq jedel-qutqarý jasaǵynyń qyzmetkerleri taýdan túsetin jolyn belgiledi. Soǵan sáıkes, qutqarýshylar Býtakov asýy (2870 m), Pıoner (3011 m) shyńy jáne Lesnoı (2400 m)asýy arqyly júrip otyryp, Býtakov shatqalyna túsýi kerek boldy. Sondaı-aq, qutqarýshylardyń eki toby bir mezette bir-birine qarsy júretin boldy. Býtakov shatqalynan shyǵatyn topqa súrleý jol salý mindeti qoıyldy. Keıin, eki top kezdesken soń, sol súrleýmen keıin oralatyn bolyp sheshildi. Qar kóshkini bolýy múmkin ýchaskelerdi jáne qar úıindileri kóp jınalǵan jerlerdi aınalyp ótý úshin osy taktıka qoldanyldy. Sonymen, eki top keýdelerine deıin qar keship, esh jerge túnemesten toqtaýsyz júrip otyrdy. Kózge túrtkisiz qarańǵylyqta (tuman jáne túngi ýaqyt) bir-birin GPS navıgatsııa arqyly baǵdarlap otyrǵanyn aıta ketken jón. Al baılanysqa spýtnıktik termınaldar paıdalanyldy. Sóıtip, Respýblıkalyq jedel-qutqarý jasaǵynyń toptary osyndaı ekstremaldy qaýipti jaǵdaıda joǵary deńgeıde úılesimdi áreket jasaı otyryp, operatsııany oıdaǵydaı aıaqtady», - dedi S. Baımuhanbetova.
