Almaty mańynda órtengen qoqys polıgonyna taǵy 10 ekskavator jiberildi
NUR-SULTAN. QazAqparat - Oqıǵa ornyna Almaty qalasynyń TJB jáne Almaty oblysynyń TJD qyzmetkerleri jiberildi, dep habarlaıdy QazAqparat tilshisi.
«16 mamyr kúni túngi ekiden asa Almaty oblysy Qarasaı aýdany Áıteı aýylynan 7 shaqyrym jerde ornalasqan qoqys polıgonynyń órtenip jatqany týraly habarlama kelip tústi. Atalǵan qoqys polıgonyna eń jaqyn - 14 shaqyrym jerdegi órt sóndirý qyzmeti jetken kezde 1 gektar aýmaqtaǵy turmystyq qatty qaldyqtardyń tutanyp, byqsyp jatqany anyqtaldy», - dedi QR ІІM Tótenshe jaǵdaılar komıtetiniń tóraǵasy Vladımır Bekker TJK-da ótken baspasóz máslıhatynda.
Onyń aıtýynsha, qoqystyń qanshalyqty tereń byqsyp, tutanyp jatqany belgili bolmaǵandyqtan, bul jaǵdaı órt sóndirýshilerge birshama kedergi keltirip otyr. Sebebi, qoqys polıgonynda buryn jar bolǵan. Sol jar qoqysqa kómilip qalǵan.
«Osyǵan baılanysty atalmysh polıgon ákimshiliginiń ınjenerlik tehnıkasy tilsiz jaýdy eńserýge jumyldyryldy. Órtenip jatqan qoqysty sóndirý úshin topyraq sekildi ınertti materıaldar paıdalanylyp jatyr. Qazirgi ýaqytta ol jerge 7 býldozer men 6 tıegish, 2 ekskavator, 14 samosval jumyldyrylǵan. Qosymsha Almaty qalasynyń TJD qyzmetkerleri (18 adam, 5 arnaıy tehnıka) men Almaty oblysynyń TJD qyzmetkerleri (17 adam) jiberildi», - deıdi ol.
Oqıǵa ornynda Almaty qalasynyń TJD bastyǵy men Almaty oblysynyń TJD bastyǵynyń orynbasary júr.
«Qoqys aýmaǵyndaǵy tilsiz jaýdy aýyzdyqtaý úshin taǵy da 10 ekskavator men 10 samosval jiberilýde. Polıgonǵa ýaqtyly ınertti materıaldardy jetkizip, tutanǵan oryndardyń betin kómý kerek», - deıdi Vladımır Bekker.
Eske sala ketsek, Almaty turǵyndary tańnan beri qala aspanyn ys pen tútin torlaǵanyn aıtyp, shaǵymdanǵan edi. Áleýmettik jeli qoldanýshylarynyń boljaýynsha, tútin Almaty oblysyndaǵy qoqys polıgonynan kelgen. Tótenshe jaǵdaılar komıteti bul aqparatty rastady.
«16 mamyr kúngi túngi saǵat 2:30-da órtke qarsy qyzmetke Qarasaı aýdanyna qarasty Áıteı aýylynan 7 shaqyrym jerde qoqys polıgony janyp jatqany týraly habar túsken. Qatty turmys qaldyqtardan tutanǵan órttiń aýmaǵy bir gektardy qamtydy degen boljam bar. Qurban bolǵan nemese zardap shekkender joq» - delingen komıtettiń málimetinde.
Dese de, Almaty qalasynyń tótenshe jaǵdaılar departamenti qoqys polıgonyndaǵy órt saldarynan shahardyń aýasy shekten tys lastanǵany týraly aqparattyń shyndyqqa janaspaıtynyn málimdedi.
