Almaty mańynda qurǵaq shóp órtenip jatyr
ALMATY. QazAqparat – Almaty aýmaǵynda jáne Almaty oblysynyń «Dýman» shaǵyn aýdanynda, sondaı-aq Talǵar aýdanynyń Besaǵash aýylynda qurǵaq shóp órtenip jatyr, dep habarlaıdy QazAqparat tilshisi.
«Saǵat 17.00-de Almatynyń Tótenshe jaǵdaılar departamentine Almaty oblysynyń Talǵar aýdany Besaǵash aýylynda taý etegindegi qurǵaq shóp janyp (15 ga) jatqany týraly habarlama tústi. Bul ýchaske Almaty terrıtorııasymen - Dýman shaǵynaýdanynyń Ábjapparov kóshesimen shektesedi. Jalynmen kúreske Almaty oblystyq TJD-nyń 4 adamy men 1 tehnıkasy, jergilikti atqarýshy organ men Іle-Alataýy memlekettik ulttyq tabıǵı parkiniń Talǵar fılıalynyń 29 qyzmetkeri men 6 tehnıkasy dereý jumyldyryldy. Óńir qutqarýshylaryna kómekke Almaty qalalyq TJD-nyń 45 adamy men 9 tehnıkasy attandyryldy. Almatynyń Qutqarý qyzmeti sý tasıtyn 25 kólik jóneltti», - dep málim etti Almatynyń Tótenshe jaǵdaılar departamentinen.
Qazirgi ýaqytta barlyq baǵyt boıynsha jalynnyń jeke sektorǵa aýysý qaýpi joq.
Eske salaıyq, 11 tamyz kúni Kóktóbe bókterinde qurǵaq shóp órtengen bolatyn. Ony sóndirýge tikushaqtar jumyldyryldy. Kóp uzamaı oqıǵa ornyna Almaty ákimi Baqytjan Saǵyntaev bardy. Bul jerdegi jalyn aýyzdyqtala bere, sol aımaqqa jaqyn jerde órttiń taǵy bir oshaǵy tutandy. Bul joly tilsiz jaý Dıvaev kóshesine jaqyn boldy. Qyzyl jalyn 1000 sharshy metr aýmaqty jalmaǵan. Sol jerden órt sóndirýshiler bir adamnyń denesin tapty. Qylmystyq is qozǵaldy.
13 tamyz kúni Almaty qalalyq TJD dala órti týraly taǵy habarlady. Bul joly jalyn Medeý men Shymbulaqqa baratyn joldy sharpydy.
