Almaty mańynda qoqys polıgonyndaǵy órt tolyq sóndirildi
NUR-SULTAN. QazAqparat - Almaty mańyndaǵy qoqys polıgonyndaǵy órt búgin keshki saǵat 18:10-da tolyq sóndirildi. Bul týraly Tótenshe jaǵdaılar komıteti málim etti, dep habarlaıdy QazAqparat tilshisi.
«Qoqys polıgonyndaǵy byqsyǵan órt búgin 18:10-da tolyq sóndirildi. Órt aýmaǵy 1 gektar jerdi qamtydy. Byqsý oshaqtaryn kómý, sý sebý jumystary aıaqtaldy. Nátıjesinde úsh kúnde KA-32 jáne MI-8 tikushaqtary 840 tekshe metr sýdy órtengen aýmaqqa septi. Arnaıy tehnıka 3 myń tekshe metr topyraq jetkizdi. Tilsiz jaýdy aýyzdyqtaýǵa Almaty oblysy men Almaty qalasy jergilikti atqarýshy organdarynan, Almaty oblysy men qalasy TJD-dan, Almaty qutqarý qyzmetinen, Ulttyq ulan, «Qazseldenqorǵaý» mekemesinen, «KAZ Waste Converrsion» JShS-nan 97 tehnıka jáne 148 adam jumyldyryldy. Qazirgi tańda «KAZ Waste Converrsion» JShS ınjenerlik tehnıkalarymen (býldozer, greıder) jer betin tegisteý, topyraq qunaryn qalpyna keltirý jumystaryn júrgizip jatyr» delingen habarlamada.
Polıgonda 2 órt sóndirýshi tehnıka men 5 samosval jáne bir býldozer kezekshilikte bolady.
Eske sala keteıik, 15 mamyr kúni Almaty turǵyndary tańnan beri qala aspanyn ys pen tútin torlaǵanyn aıtyp, shaǵymdanǵan edi. Áleýmettik jeli qoldanýshylarynyń boljaýynsha, tútin Almaty oblysyndaǵy qoqys polıgonynan kelgen. Tótenshe jaǵdaılar komıteti bul aqparatty rastady.
«16 mamyr kúni túngi saǵat 2:30-da órtke qarsy qyzmetke Qarasaı aýdanyna qarasty Áıteı aýylynan 7 shaqyrym jerdegi qoqys polıgony janyp jatqany týraly habar túsken. Qatty turmys qaldyqtardan tutanǵan órttiń aýmaǵy bir gektardy qamtydy degen boljam bar. Qurban bolǵan nemese zardap shekkender joq» - delingen komıtettiń málimetinde.
Dese de, Almaty qalasynyń tótenshe jaǵdaılar departamenti qoqys polıgonyndaǵy órt saldarynan shahardyń aýasy shekten tys lastanǵany týraly aqparattyń shyndyqqa janaspaıtynyn málimdedi.
