Almaty mańynda boı kóteretin jańa áýejaı qandaı bolmaq
ALMATY. QazAqparat - Almaty mańynda boı kóteretin jańa áýejaıdyń qandaı bolatyny belgili boldy. QR Investıtsııalar jáne damý mınıstrligi QazAqparat agenttiginiń osyǵan baılanysty saýalyna jaýap berdi.
«Almaty Qazaqstannyń týrızm salasyndaǵy halyqaralyq ortalyǵy bolyp tabylady. Sondyqtan, munda zamanaýı áýejaı ınfraqurylymy paıda bolýy tıis. «Ult josparynyń 100 naqty qadamy» jobasy aıasynda munda halyqaralyq avıatsııalyq hab salynady. Qurylysqa strategııalyq ınvestor tartylady», - dedi vıtse-mınıstr Qaıyrbek Óskenbaev agenttiktiń saýalyna resmı jaýabynda.
Joba operatory «MG Holdıng» jobany júzege asyrý úshin Sıngapýr memleketinen qarjy tartýmen aınalysyp jatyr.
Vedomstvoda habarlaǵandaı, ınvestıtsııalyq qaýipsizdik maqsatynda «MG Holdıng» Qazaqstan men Sıngapýr arasynda arnaıy kelisimshart jasalǵan. Qazir atalǵan qujat Sıngapýr úkimetinde qaralyp jatyr.
«Jobanyń negizgi talaby - 22 ga jer ýchaskesin 100 jylǵa qaıtarymsyz basqarý quqyǵyn berý bolyp tabylady. Sonymen qatar, salyqtyq jeńildikter, kedendik preferentsııalar, erekshe vızalyq rejimdi engizý kózdelgen. Jeke ákimshilik terrıtorııasy bar seriktes qala turǵyzý da josparda bar. Onda «aǵylshyn quqyǵy» qoldanylady. Sondyqtan, bul ratıfıkatsııalaýdy talap etedi», - dep jaýap berdi mınıstrlik ókilderi.
