Almaty mańynda aıýdan qashyp, palatkaǵa tyǵylǵan tórt týrıst qutqaryldy
ALMATY. QazAqparat – Respýblıkalyq jedel-qutqarý otrıadynyń (RJQO) qutqarýshylary Almaty mańyndaǵy Іle Alataýda tórt týrısti ajaldan aman alyp qaldy, dep habarlaıdy QazAqparat tilshisi RJQO baspasóz qyzmetine silteme jasap.
Іle Alataýy kórkine kóz toımaıtyn kórkem ólke. Ań-qusqa baı aımaq. Karantın ýaqytynda adamdar demalý úshin ol jaqqa barýdy azaıta bastady. Sodan da bolsa kerek, jabaıy ańdar yldıǵa túsýdi jıiletken.
«17 shilde kúni túnde Respýblıkalyq jedel-qutqarý otrıadynyń kezekshi bólimine tórt týrıstiń kómekke zárý ekeni týraly habarlama kelip tústi. Tórt jigit Alma-Arasan ańǵarynyń tusyna jaqyndap, sol jerge ýaqytsha turaqtaǵan. Endi úılerine jınala bergende jaqyn mańnan túz taǵysynyń gúrildegen daýysy shyǵypty. Onyń aıý ekenin baıqaǵan jigitter palatkaǵa tyǵylyp qalady. Іshte otyryp, tórt jigit aıýdyń mańaıdy timiskilep júrgenin sezedi. Aıý ketken. Qarańǵylyq túskennen soń týrıster qaıda bararyn bilmeı dal bolypty. Olar polıtsııaǵa habar berip, oqıǵa ornyna RJQO qyzmetkerleri jetken», - delingen habarlamada.
Úreılengen týrısterdi qutqarýshylar polıtsııa qyzmetkerlerine tapsyrdy.
