Almaty mańynda avtobýs pen jeńil kólik soǵysyp, eki adam aýrýhanaǵa jetkizildi
QONAEV. QazAqparat- «Altyn Orda» bazary mańynda №112 avtobýs jeńil kólikke soqtyǵysyp, keıin qorshaýǵa soǵyldy. Saldarynan eki adam zardap shekti, dep habarlaıdy QazAqparat tilshisi.
Oqıǵanyń vıdeosy áleýmettik jelide tarady.
Almaty oblystyq polıtsııa departamentiniń málimetinshe, jol apaty 23 sáýir kúni keshki saǵat 19:00 shamasynda bolǵan.
«Almaty-Bishkek» tasjolynyń 17-shaqyrymynda kele jatqan Yutong avtobýsynyń júrgizýshisi araqashyqtyqty saqtamaı, aldynda kele jatqan DAEWOO kóligimen soqtyǵysyp, ol ınertsııamen beton joldyń jıegine soǵylǵan. Avtobýs ta beton jıekke, keıin ınertsııamen metall qorshaýdy soqqan»,- dep habarlady vedomstvodan.
Apat saldarynan 1971 jyly týǵan áıel men 7 jasar bala zardap shekti. Olar aýrýhanaǵa jatqyzyldy.
Polıtsııanyń aıtýynsha, atalǵan derek boıynsha qajetti saraptama taǵaıyndalǵan.
Avtobýs júrgizýshisine qatysty QR ÁQBtK 610-baby 2-bóligi boıynsha ákimshilik hattama toltyryldy.
