Almaty mańynda 8 ormandy alqap pen 144 park kenege qarsy óńdeledi
Almaty sanıtarııalyq-epıdemıologııalyq baqylaý departamentiniń málimetinshe, óńdeý jumystarymen 8 ormandy alqap (1904,924 ga) jáne 144 qala saıabaǵy men skveri (519,616 ga) qamtylady.
Ol aýa raıyna baılanysty kestege sáıkes 16 mamyrdan 10 maýsymǵa deıin júrgiziledi.
Dezınsektsııalyq is-sharany qalalyq sanıtarııalyq-epıdemıologııalyq baqylaý qyzmetiniń mamandarynyń baqylaýymen «Almaty qalasynyń dezınfektsııa ortalyǵy» fılıaly atqarady. Jasaqtalǵan dezbrıgadalar qajetti quraldarmen, kólikpen jáne jeke bas qorǵanysh zattarymen jabdyqtalǵan.
«Kene entsefalıtine qarsy dezınsektsııalyq óńdeý jumystaryn júrgizý úshin «Favorıt» akarıtsıdtik preparaty qoldanylady. Preparat az ýytty jáne qaýipti emes sanatqa jatady (3-4 top). Kenemen kúreske eń az doza qoldanylady jáne ol adamdar men janýarlarǵa qaýipsiz. Óńdeý jumystary tańǵy ýaqytta júrgiziledi. Óńdeletin aýmaqtardyń shekarasynda eskertý belgileri ornatylady», - delinedi vedomstvo habarlamasynda.
Dezınsektsııalyq óńdeýge baılanysty qalalyq sanıtarııalyq-epıdemıologııalyq baqylaý departamenti qala qonaqtary men turǵyndaryn saqtyq sharalaryn saqtaýǵa shaqyrdy.
Akarıtsıdty preparattyń eritindisin denege nemese kıimge tıgizip almas úshin kenege qarsy dezınsektsııalyq óńdeý jumystary júrgizilgen jerlerden qashyqtaý júrý kerek;
- jerge shashyraǵan preparat kepkenge deıin úı janýarlaryn óńdeý júrgizilgen jerge jibermeý kerek;
- óńdeý jumystary júrgizilgen jerden 40 kún boıy sańyraýqulaq, shóp nemese jıdek jınaýǵa jáne paıdalanýǵa bolmaıdy;
- qala turǵyndary men qonaqtary kenege qarsy óńdeý jumystary júrgizilgen kezde jáne odan keıin úsh kún ishinde qala saıabaqtary men skverlerge, tabıǵı oshaqtarǵa barmaýy kerek.
Eske salaıyq, Almatyda sáýir aıynda 40 adamdy kene shaqty, sondaı-aq, Almatyda 5 sáýirde kenege qarsy dezınfektsııalyq óńdeý jumystarynyń birinshi kezeńi bastalǵan bolatyn.
