Almaty mańynda 5 qar barysy mekendeıdi
«Іle Alataýynda ómir súretin 40 qar barysynyń 23-i Almatydan 30 shaqyrym jerde, beseýi qalanyń Bostandyq jáne Medeý aýdandarynyń aýmaǵynda mekendeıdi»,- deıdi ǵalym.
Onyń aıtýynsha, búgingi kúni Qazaqstanda qar barysynyń sany ósip jatyr.
«Mysaly, 90-jyldardyń basynda qar barysy tek Aqsý-Jabaǵyly men Almaty qoryqtarynda boldy. Qazirgi tańda elimizde 10-nan astam ulttyq saıabaq bar. Olardyń bárinde qar barysy bar. ıAǵnı, qazir olar kóbeıý ústinde. Eger 80-jyldary 200 qar barysy bolsa, 90-jyldardyń basynda olardyń sany 100-ge deıin azaıdy, búgingi kúni bizdiń baǵalaýymyzsha olardyń sany 140-180 basqa jetti», - dedi Alekseı Grachev.
Qar barysy atalǵanymen bul jyrtqysh qurǵaq, qaraıǵan jerlerdi jaqsy kóredi.
«Jemtigin aýlaý úshin qar barysyna kóp energııa qajet. Kóbine jasaıtyn ańshylyǵynyń 10-nan bireýi ǵana sátti bolady. Sebebi, qatal jaǵdaıda ómir súredi. Kúshin únemdeý úshin qurǵaq jerlerde júredi»,- dedi spıker.
Qar barysy júrýi múmkin jerlerge fototuzaqtar qoıylady.
«Qar barysynyń boıy bıik emes. Bıiktigi - 50 sm, ıaǵnı, jarty metr bolady. Sondyqtan biz olar júredi-aý degen jerlerge qarama qarsy eki fototuzaqty ornatamyz. Qar barysyn tolyq beınede sýretke túsirý úshin fototuzaqty tym tómen nemese tym joǵary ornatpaý kerek. Fotoǵa barystyń basy, aıaǵy, quıryǵy túsýi kerek. Sátti sýretterdi biz saraptap, terisindegi daqtary arqyly bir-birinen ajyratyp, olardyń árqaısysyna qujat ashyp, baqylaý júrgizemiz»,- dedi spıker.
Qar barysyn aýlaımyn degen brakonerler 3000 AEK kóleminde jazalanady.
«Eger brakoner ulttyq saıabaqtyń aýmaǵynda bul qylmysty jasasa, joǵaryda atalǵan soma pálenbaı ese ulǵaıady. Bul qylmystyq jaýapkershilikke de ákelýi múmkin»,- dedi spıker.
Aıta keteıik, búgin - Halyqaralyq qar barysy kúni. Olar Qazaqstannyń sırek kezdesetin iri jyrtqyshtarynyń biri, 1978 jyly elimizdiń Qyzyl kitabyna engizilgen.
