Almaty mańynda 17 jastaǵy jigit taksı jolaýshysyn zorlap, tonap ketti

ALMATY. QazAqparat - Almaty oblysynda taksıde qasyndaǵy jolserigin zorlady, onymen qosa tonady degen kúdikpen 17 jastaǵy jigit ustaldy, dep habarlaıdy QazAqparat tilshisi Polisia.kz resýrsyna silteme jasap.

Іle aýdandyq polıtsııa bólimine jas áıel aryz túsirdi.

Onyń aıtýynsha, ol 9 qazan túngi saǵat úsh shamasynda Almaty qalasynyń №1 temirjol vokzalynda úıine jetý úshin taksı ustaǵan.

Áıeldi alǵan soń taksı júrgizýshisi qasyndaǵy taǵy bir jolaýshynyń ótinishi boıynsha Túımebaev aýylynyń janyndaǵy joldan burylyp, qańyrap bos qalǵan jerge aparǵan.

«Sol jerde oǵan shabýyl jasap, uryp-soǵyp, zorlap, altyn alqasyn tartyp alǵan. Qylmys taksı júrgizýshisiniń qatysýymen jasaldy. Ol zorlyq jasaǵan adamǵa óziniń áreketsizdigimen kómektesip, onyń seriktesi bolyp shyqty»,- delingen habarlamada.

Tártip saqshylary kúdikti retinde Buryndaı kentiniń 17 jastaǵy turǵynyn ustady.

«Kúdikti qylmysyn moıyndap, qamaýǵa alyndy. Sondaı-aq 22 jastaǵy taksı júrgizýshisi de ustaldy. Ol ekeýi jerles bolyp shyqty. Taksı júrgizýshiniń áreketine tergeý kezinde tıisti quqyqtyq baǵa beriledi»,-dep atap ótti polıtsııadaǵylar.

Qylmystyq is QR QK 120-babynyń 1-bóligi (zorlaý) jáne QR QK 191-babynyń 2-bóligi (tonaý) boıynsha qozǵaldy.