Almaty mańyna aqqutandar ushyp keldi

ALMATY. QazAqparat - Almaty ózeninde júzip júrgen aqqutandar qalalyqtardy tańǵaldyrdy. Tosyn qubylysty Ekologııa, geologııa, tabıǵı resýrstar mınıstrligi túsindirdi, dep habarlaıdy QazAqparat tilshisi.

Bul vıdeo áleýmettik jelide tarady.

Mınıstrliktiń baspasóz hatshysy Samal Ibraevanyń aıtýynsha, aqquttandar Egretta alba (Linnaeus, 1758) Qazaqstannyń ońtústiginde jıi qystaıdy eken.

Kópshiligi basqa elderge ushyp ketedi, birazy Almaty, Almaty oblystarynda qalady.

«Qatpaıtyn sý qoımalarynda bul qustardy jıi baıqaýǵa bolady. Ár qysta aqqutandar Almaty zoobaǵynda qystaıdy. Klımat ózgerip, qorek azaısa, bul qustar aýyp kete beredi. Turǵyndar qustarǵa qııanat jasamasa boldy»,- dedi Samal Ibraeva.

Úlken aqqutandar uıa salatyn jyl qusyna jatady.

Olar balyqpen, kólbaqalarmen, kókqasqa shegirtkemen, ıneliktermen, jándiktermen jáne olardyń dernásilderimen, usaq kemirgishtermen, kesirtkelermen qorektenedi.

Qazaqstanǵa naýryz aıynda ushyp keledi de, qazan aıynda jyly jaqqa ushyp ketedi. Keıbir qutandar Qazaqstannyń ońtústigindegi qatpaıtyn ózenderdiń boıynda qystap qalady.

Bir kezde aqqutandar qaýyrsynyna bola kóp aýlanǵan. Aqqutan — sırek kezdesetin qus.