«Almaty-Mańǵyshlaq» poıyzynda bıleti joq 29 jolaýshy anyqtaldy
ShYMKENT. QazAqparat - QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń Shymkent qalasy boıynsha departamenti jumys tobymen birlesip, reıdtik sharalar júrgizdi. Tekserýler barysynda poıyzdarda jolaýshylardy tasymaldaý qaǵıdalary birneshe ret buzylǵandyǵy anyqtaldy, dep habarlaıdy QazAqparat tilshisi.
Reıd kezinde №377/378 «Almaty - Mańǵyshlaq», «Aqtóbe-Almaty» eki jolaýshylar poıyzy tekserildi. Nátıjesinde Shymkent-Arys ýchaskesinde "Almaty-Mańǵyshlaq" qatynasyndaǵy poıyzda 29 bıletsiz jolaýshy anyqtaldy.
«Jolaýshylardy bıletsiz tasymaldaý jáıti boıynsha QR ÁQBtK-niń 623-babynyń 4-bóligi boıynsha poıyz bastyǵyna qatysty ákimshilik hattama toltyryldy. Sondaı-aq QR ÁQBtK-niń 571-babynyń 4-bóligi boıynsha Temirjol kóligimen júkterdi, jolaýshylardy, bagajdy jáne júk bagajyn tasymaldaý qaǵıdalaryn buzǵany úshin "Jolaýshylar tasymaly" AQ-nyń zańdy tulǵasy "Batys" aımaqtyq fılıaly ákimshilik jaýapkershilikke tartylatyn bolady», delingen habarlamada.
Sonymen qatar, "Aqtóbe - Almaty" baǵytyndaǵy №24 poıyzda múgedekter arbasymen qozǵalatyn tulǵalardy otyrǵyzatyn jáne túsiretin kótergish qurylǵysy bar vagon bolmaı shyqty. Budan ózge, shtab vagonynda shaǵymdar men usynystar jáshigi qoıylmaǵany anyqtaldy. Atalǵan quqyq buzýshylyqtar boıynsha "Jolaýshylar tasymaly" AQ zańdy tulǵasy "Batys" aımaqtyq fılıaly QR ÁQBtK-niń 571-babynyń 4-bóligine sáıkes is qozǵalyp, jaýapkershilikke tartý máselesi qaralýda.
