Almaty qyzmetteri qalany qysta tazartý jumystaryna daıyndalýda
ALMATY. Tamyzdyń 26-sy. QazAqparat /Názıra Eleýhan/ - Búgin qala ákimi Ahmetjan Esimov 2010-2011 jyldary qalany qysta tazartý jumystaryna daıyndyq týraly májilis ótkizdi. Oǵan aýdan ákimderi, energetıkalyq keshen qyzmetkerleri, memlekettik organ basshylary qatysty,
dep habarlaıdy QazAqparat.
Bıyl Almatyda tuńǵysh ret kóshelerdi birden 10 kompanııa tazartatyn bolady. Osyǵan oraı, Ahmetjan Esimov ózderiniń merdigerlik uıymdarmen baılanystaryn jaqsartýy tıis ekendigi jóninde aýdan ákimderine jaýapkershilik júktedi.
«Men bul iste árqaısylaryńyz jeke jaýap beretindikterińizdi esterińizge salamyn. Jeńimpazdardy anyqtaý jónindegi konkýrstarda laıyqty kásiporyndar alǵa sýyrylyp shyqty degen úmittemin», - dedi Ahmetjan Esimov jeti aýdannyń ákimine.
Qala ákimi jıyn barysynda, eger uıym nemese kásiporyn óz mindetin durys atqarmasa, onda olarǵa ákimshilik shara qoldanýdy, tipti jasalǵan kelisim sharttyń buzylatyny týraly da atap ótti. "Bul qys kezinde tehnıkalardyń durys jumys isteýin, qalanyń barynsha taza bolýyn qamtamasyz etýge yqpal etedi. Sonymen qatar, merdiger uıymdar naqtyly tehnologııalyq júıe jasap, ár tehnıkany tolyq, barynsha tıimdi paıdalanýlary tıis", dedi qala basshysy.
Májilis jumysyn qorytyndylaǵan qala basshysy aýdan ákimderine merdigerlik uıymdarmen birlesip, qys kezinde kósheler men trotýarlardy qardan tazartýdyń naqtyly júıesin jasaýdy tapsyrdy. Jumysqa baqylaýdy kúsheıtýdi qadap aıtty. Sonymen qatar, aýdan ákimderine JPK basshylaryn qatystyra otyryp, ishki aýlalardy tazartý jumystaryn óz deńgeıinde júrgizý jaıynda keńes ótkizýlerin tapsyrdy.
Qala kósheleriniń tazartylatyn kólemi 14,3 mıllıon sharshy metrdi, júrginshiler joly 1,6 mıllıon sharshy metrdi quraıdy.
